Elorda mektepterinde tumaýdyń aldyn alý sharalary júrgizilýde
ASTANA. QazAqparat - Astanada josparǵa sáıkes, bilim berý uıymdarynda tumaý men jiti respıratorlyq vırýsty ınfektsııanyń aldyn alý sharalary qolǵa alyndy. Bul týraly qalanyń ákimdiginiń resmı saıtynda habarlandy.
«Elordalyq bilim berý uıymdarynda tumaýdyń aldyn alý jáne onyń taralýyn boldyrmaý maqsatynda sanıtarlyq posttar uıymdastyrylyp, JRVI men tumaýdyń aldyn alý boıynsha aqparattyq buryshtar jasaldy, naýqastanǵan balalardy tirkeý jýrnaly júrgizilip, kún saıynǵy aqparat Tutynýshylardyń quqyqtaryn qorǵaý departamentine jiberiledi», delingen habarlamada.
Qańtar aıynyń sońyndaǵy jaǵdaı boıynsha, 2 156 turǵyn tumaý men JRVI-ge shaldyqqan, sonyń ishinde 1 132-i oqýshy, 1 012-i mektep jasyna deıingi balalar jáne 12-i stýdent.
Mektepterde ata-analar jınalystary ótkizilip, mamandar juqpaly aýrýlardyń taralýynyń aldyn alýdy túsindirdi. Jalpy bilim beretin mektepterde 2-9 synyp oqýshylary arasynda valeologııa sabaǵynda jazbasha jumystar júrgizilip, JRVI men tumaýdyń aldyn alý boıynsha beınerolıkter kórsetildi.
Aıta keteıik, Astanada JRVI men tumaý boıynsha epıdemıologııalyq jaǵdaı turaqty, mektepterde karantın joq. «Tumaý» dıagnozy zerthanalyq qorytyndydan keıin ǵana qoıylady.
Eske salaıyq, Astanada 180 memlekettik bilim berý mekemesi bar, sonyń ishinde 83 jalpy bilim beretin mektep (113 376 oqýshy), 85 balabaqsha (34 454 bala), 12 kolledj (11785 stýdent).
