Elorda mektepterinde sońǵy qońyraý qalaı ótedi
NUR-SULTAN. QazAqparat - 25 mamyrda elordalyq mektepterde dástúrli sońǵy qońyraý ótedi. Bıyl 1-10 synyp oqýshylary úshin is-shara onlaın formatta, al mektep bitirýshi túlekter úshin bilim mekemeleriniń aýlalarynda ótkiziledi, dep habarlaıdy QazAqparat qala ákimdiginiń resmı saıtyna silteme jasap.
Elordalyq bilim basqarmasynyń habarlaýynsha, 1-10 synyp oqýshylary úshin sońǵy qońyraý onlaın, ıaǵnı synyp saǵaty túrinde ótedi.
Al 11 synyp túlekteri úshin is-shara Nur-Sultan qalasynyń sanıtarlyq-epıdemıologııalyq baqylaý departamentiniń usynymdaryna sáıkes ashyq aýada, mektep aýlasynda dástúrli formatta ótkiziledi. Bul rette barlyq sanıtarlyq-epıdemıologııalyq talaptar saqtalatyn bolady. Mektep aýmaǵynda jáne ǵımaratynda qashyqtyqty qamtamasyz etý úshin belgiler qoıyldy. Oǵan túlekterdiń ata-analary nemese zańdy ókilderi qatysa alady. Al mektep oqytýshylary quramynan alty adamnan artyq qatysýyna tyıym salynady.
Maska rejımi jáne is-sharaǵa qatysýshylar arasynda keminde 2 metr qashyqtyqty saqtaý qamtamasyz etiledi.
