Elorda mektepterinde «Smart Astana balalary» atty jyl saıynǵy baıqaý bastaldy
ASTANA. 11 qyrkúıek. QazAqparat - Oqý jylynyń basynda qalalyq mektepterde «Smart Astana» tujyrymdamasy aıasynda orta mektep oqýshylarynyń arasynda ınnovatsııalyq baǵyttaǵy «Smart Astana balalary» jyl saıynǵy baıqaýy qolǵa alynady. Bul týraly astana.kz saıtyna «Astana Innovations» AQ baspasóz qyzmetinen habarlady.
«Baıqaý 1-5 synyp oqýshylary úshin «Úzdik balalar sýreti» jáne 6-11 synyp oqýshylary úshin «Úzdik mektep shyǵarmasy (nemese esse)» atalymdary boıynsha ótedi», - delingen aqparatta.
Baıqaýǵa qatysýshylardyń beıneleý janry salasyndaǵy jáne sıýjetti tańdaýdaǵy qııalyna shek qoıylmaıdy, al shyǵarmany (esseni) proza túrinde de, óleń túrinde de jazýǵa bolady. Úzdik shyǵarmalar (nemese esseler) baıqaý taqyrybyna saı, avtorlyq pozıtsııaǵa ıe, taqyryby mazmundy ári biregeı bolýy tıis.
Baıqaýǵa usynylǵan eńbekter mindetti túrde baıqaý taqyrybyna sáıkes bolyp, avtordyń elordanyń bolashaǵy týraly túsinigin jetkizý kerek. Qoıylǵan talaptarǵa sáıkes kelmegen jumystar baıqaýdyń mektepterde ótetin birinshi kezeńinde-aq irikteýden ótpeıdi.
Eske salaıyq, baıqaýdyń taqyryby elordanyń bolashaǵy, ınnovatsııalyq damýy, «aqyldy qala» tehnologııalaryn paıdalaný bolyp tabylady. Bıyl úzdik eńbekter joǵary baǵalanyp, avtorlar 26 qyrkúıekte ótetin «Smart Astana» konferentsııasynda marapattalatyn bolady. Ár atalym boıynsha bas júlde - iPad 16 Gb.
Aıta keteıik, baıqaý qalalyq mektepter arasynda keńinen taraǵan. Ótken jyldary oǵan 400-ge jýyq jumys usynylǵan bolatyn. Byltyr baıqaý jeńimpazdaryna «Smart Astana» jyl saıynǵy konferentsııasyn ótkizý aıasynda dıplomdar men baǵaly syılyqtar, «Dısneılendke» joldama tabystaldy.
