Elorda mektepterinde «Pedagog mártebesi týraly» jańa zań talaptary qalaı oryndalyp jatyr
NUR-SULTAN. QazAqparat – «Pedagog mártebesi týraly» jańa zań jobasyna sáıkes mektep muǵalimderinen artyq esep-qısap talap etýge nemese mindetinen tys ózge jumysqa tartýǵa tyıym salynǵan. Osy oraıda búginde bas qalada usztardyń kásibı quqyǵynyń zań aıasynda júzege asyrylý barysy tekserilýde.
Bul týraly Nur-Sultan qalasynyń bilim salasynda sapany qamtamasyz etý departamentiniń basshysy Baǵymgúl Kóptileýova málim etti, dep habarlaıdy QazAqparat tilshisi.
«Mınıstrdiń tapsyrmasyna sáıkes, 1 sáýirden bastap departament ókilderdi ustazdardan artyq esep-qısap talap etý máselesine monıtorıng júrgizip jatyr. Aldymen mınıstrliktiń osy №133 buıryǵyn oryndaý maqsatynda bilim berý uıymdarynyń basshylary men qyzmetkerlerine aqparattyq túsindirý jumystary júrgizildi. Sondaı-aq, osy buıryqty negizge ala otyryp, ustazdardyń jumysy barysynda qaıtalanatyn 26 esep tizimnen alynyp tastaldy. Munyń ózi ustazdardyń jumysyn jeńildetýge septigin tıgizdi», - dedi ol.
Departament basshysynyń sózine sensek, muǵalimderden artyq esep talap etkeni úshin aıyppul qarastyrylǵan. Onyń kólemi 20-dan 120 AEK-ti quraıdy.
«Osy oraıda elordalyq ustazdarǵa aıtatynymyz, óz qyzmetinen tys jumystarǵa tartý jaǵdaıy tirkelse nemese artyq esep talap etilse, ondaı quqyqbuzýshylyq týraly bizdiń departamentke habarlasýlaryna bolady», - deıdi ol.
