Elorda mektebine sheıhtardyń atyn berýge qatysty ákimdikte túsinikteme berildi
NUR-SULTAN. QazAqparat - Nur-Sultan qalasynyń Tilderdi damytý jáne muraǵat isi basqarmasynyń basshysy Tileýǵalı Qyshqashbaev elordalyq mektepterge arab sheıhteriniń esimin berý usynysy jaıly túsinikteme berdi, dep habarlaıdy QazAqparat Elorda Infoǵa silteme jasap.
«Mektep – bilim berý júıesindegi eń basty nysandardyń biri. Qazirgi ýaqytta qalada 87 mektep bar. Sonyń ishindegi 10 mektepke Qazaqstandaǵy áıgili tulǵanyń esimi berilgen. Odan bólek, qalamyzdyń damýyna sheteldik ınvestorlar da óz úlesin qosýda. Mysaly, sheıh esimderin berýge usynys jasalǵan mektepter sheteldik ınvestıtsııaǵa salynǵan. Osylaısha, Halıfa ıbn Zaıd ál-Nahaıan atyndaǵy gýmanıtarlyq qor №84 mektep-lıtseıiniń qurylysyn tolyqtaı qarjylandyrǵan, al №85 mekteptiń qurylysyn Katar memleketiniń damý qory qarjylaı qamtamasyz etken. Atalmysh bilim berý uıymdary ınvestorlar tarapynan bilim berýge qajetti barlyq quraldarmen jabdyqtaldy», - dedi Tileýǵalı Qyshqashbaev.
Ákimdiktegi málimdemege sáıkes, ınvestorlar mektep qurylysynan bólek, bilim berý ordalarynyń materıaldy-tehnıkalyq jabdyqtalýyn da óz moıyndaryna alǵan. Jekeleı alǵanda, qajet bolǵan jaǵdaıda qurylys jumystary júrgizilip, oqý quraldary alynady. T.Qyshqashbaevtyń aıtýynsha, mektepterge arab sheıhteriniń esimderin berý týraly usynys osy mektepterdiń basshylarynan kelip túsken. 2019 jyldyń 3 qazanynda qalalyq onomastıkalyq komıssııada 12 bilim berý ortalyqtaryna esim berý máselesi qarastyrylyp óz sheshimin tapqan. Jiberilgen usynys QR Úkimeti janyndaǵy Respýblıkalyq onomastıkalyq komıssııaǵa qarastyrý úshin jiberiledi. Esterińizge sala ketsek, budan bólek elordalyq mektepterge Jumabek Táshenov, Ahmet Baıtursynov, Beıimbet Maılın, Shákárim Qudaıberdiuly, Máshhúr Júsip Kópeıuly, Іlııas Jansúgirov, Mirjaqyp Dýlatov, Álıhan Bókeıhan, Sáken Seıfýllınniń syndy qoǵam qaıratkerleriniń esimderi beriledi. Sonymen qatar, Oqýshylar saraıy Ábý Nasyr ál-Farabıdiń esimimen atalmaq.
