Elorda mektebindegi ballon oqıǵasy: Oqýshy aıaq kıim kremi dep oılaǵan
NUR-SULTAN. QazAqparat – Atalǵan oqys oqıǵaǵa qatysty Nur-Sultan qalalyq Polıtsııa departamenti resmı aqparat taratty, dep habarlaıdy QazAqparat.
«Tekserý barysynda 5 synyp oqýshysyna qorǵaný maqsatynda ata-anasynyń satyp alyp bergeni anyqtaldy. 5 qyrkúıek kúni úzilis kezinde oqýshy qyz qaltasynan gaz ballonnyń qalaı túsip qalǵanyn baıqamaǵan. Ony basqa synyptasy taýyp alyp, aıaq kıim maılaıtyn krem dep oılap, aıaq kıimine sepken. Onyń qorǵaný úshin shashatyn gaz ballony ekenin qoldanǵanda ǵana bilgen», - dep habarlaıdy departament.
Qalalyq vedomstvo óz kezeginde ata-analarǵa mekteptiń ishki jarǵylarymen qaıta tanysýdy usynady. Sonymen qatar, gaz ballony sekildi qorǵanysh quraldaryn qoldanbas buryn, balalardy ony qoldaný erejesimen tanystyrý kerektigin eskertedi.
«Osy sekildi oqys oqıǵalardy boldyrmaý jáne aldyn alý maqsatynda mektep keńesinde quqyq buzýshylyq boıynsha profılaktıkalyq is-sharalar uıymdastyrylatyn bolady», - delingen aqparatta.
Eske sala ketsek, keshe elordadaǵy №54 orta mektepte qorǵanysh gaz ballonynan ýlanǵan 9 bala aýrýhanaǵa tústi.
Araǵa az ýaqyt salyp oqys oqıǵadan zardap shekken oqýshylardyń jaǵdaıyna qatysty qalalyq Densaýlyq saqtaý basqarmasy túsinikteme berdi.
Oqıǵadan 5-synypta oqıtyn 8 bala zardap shekken. Jedel járdem olardy №2 qalalyq aýrýhanaǵa jetkizgen. «Tekserýde 9 balanyń jaǵdaıy qanaǵattanarlyq dep baǵalandy. Olardan jótel, bas aınalý, kózden jas aǵý, álsizdik belgileri baıqalǵan. Barlyq balalar maman tekserýinen ótip, saraptamaǵa qan tapsyrdy. Qazirgi ýaqytta balalar №2 qalalyq aýrýhananyń qabyldaý-dıagnostıkalyq bóliminiń jiti baqylaýynda», - dep habarlady qalalyq qoǵamdyq densaýlyq saqtaý basqarmasy.
