Elorda medkolledjiniń stýdentteri jataqhanadaǵy qandalaǵa shaǵymdandy
ASTANA. QazAqparat - Astanadaǵy Joǵary medıtsınalyq kolledj stýdentteri oqý ornynyń aýdıtorııalary men jataqhanasyndaǵy qandalaǵa shaǵymdandy, dep habarlaıdy QazAqparat.
Kýágerler tereze mańyndaǵy jándikti beıne taspaǵa túsirip, redaktsııaǵa jiberdi. Osy oraıda «QazAqparat» tilshisi oqý ornynyń dırektory Aqbala Sarjanovadan atalǵan máseleniń mán-jaıyn surady.
«Bul jándikter osyǵan deıin bolǵan emes. Biz árdaıym osy baǵytta qajetti sharalardy iske asyrýdamyz. Mereke ári demalys kúnderi, ıaǵnı 30 qarashadan bastap 2 jeltoqsan aralyǵynda jataqhanaǵa dezınfektsııa júrgizildi. Jataqhanada tek úsh-tórt bólmede ǵana taralǵan eken. Biz onda turyp jatqan stýdentterdi shyǵaryp, dezınfektsııa jasadyq. Keshe sabaq kezinde stýdentter qandalaǵa uqsas jándikti baıqap qalǵan. Osydan keıin biz tolyqtaı oqý korpýsyn tekserip shyqtyq jáne eshbir aýdıtorııada anyqtalmady. Atap aıtqanda, jeke ózim árbir qabatty, aýdıtorııany aralap, tekserdim. Óz kezeginde stýdentter qandalaǵa uqsas jándikti kórgendigin aıtty», - dep túsindirdi kolledj dırektory.
A. Sarjanovanyń sózin qaraǵanda, dezınfektsııalyq sharalar kezinde stýdentter qaladaǵy týystaryna nemese úılerine ketedi.
Sonymen qatar ol oqý ornynyń ǵımarattarynda zııankesterdiń taralmaýyna jol bermeý jumystary tıisti uıymdar tarapynan turaqty negizde júrgiziletinin, kelesi dezınfektsııa jańajyldyq merekeleý kezinde iske asyrylatynyn atap ótti.
