Elorda mańyndaǵy zıratty sý basý qaýpi bar
NUR-SULTAN. QazAqparat – Elorda mańynda ornalasqan zıratty sý alyp ketýi yqtımal. Bul týraly qalalyq Baıqońyr aýdany ákiminiń orynbasary Erlan Jaýlybaev málim etti, dep habarlaıdy QazAqparat tilshisi.
Nur-Sultan ákimdiginde ótken Qoǵamdyq keńestiń otyrysynda atalmysh máseleni Erlan Jaýlybaev qalalyq Otyn-energetıkalyq kesheni jáne kommýnaldyq sharýashylyq basqarmasy basshysynyń mindetin atqarýshy Ernat Bázildiń aldynda kóterdi. Onyń aıtýynsha, zırattyń tolyq aýmaǵy basqarmadan Baıqońyr ákimdigine berilmegen.
«Zırattyń syrtynda «Biz de sizdeı bolǵanbyz, siz de bizdeı bolarsyz» dep jazylyp tur eken. Sondyqtan, myna máseleni kótergim keledi: kóktemde ol zıratqa sý ketedi. Byltyr 9 beıitti sý alyp ketti. Sizder zıratty bizdiń balansqa áli bergen joqsyzdar. Biz 640 gektardyń 63 gektaryn ǵana aldyq. Ol jerge zıratty kim belgilegenin bilmeımin, oıǵa aparyp qoıǵan. Jan-jaǵyn qazyp, qandaı da bir jumystar atqarylmasa – kelesi jyly zırattyń bárin sý alady. Kókshetaý-Qostanaı aınalma tasjolyndaǵy beıitterdiń sany myńǵa bardy. Bizdiń aýdanda ol máseleni sheshetin aqsha joq», - dedi ol.
Bul máselege baılanysty qalalyq Qoǵamdyq keńestiń tóraǵasy Sansyzbaı Esilov Ernat Bázilge sol zıratqa qatysty máseleni arnaıy zerttep qaıtýǵa usynys bildirdi. Óz kezeginde basqarma basshysy atalmysh másele qolǵa alynatynyn aıtyp, jaýap berdi.
