Elorda mańyndaǵy azyq-túlik beldeýin damytý baǵytynda 7 joba júzege asyrylýda
KÓKShETAÝ. QazAqparat - Elorda mańynda azyq-túlik beldeýin damytý úshin Aqmola oblysynyń Aqkól aýdanynda 7 joba júzege asyrylýda, dep habarlaıdy QazAqparat tilshisi.
Aqkól aýdanynyń ákimi Talǵat Edigenov óńirdiń 2018 jylǵy áleýmettik-ekonomıkalyq damýynyń qorytyndylary týraly turǵyndar aldyndaǵy esep berý kezdesýin ótkizdi.
«Bıylǵy jyly aýdan dıqandary agrotehnıkalyq sharalardy utymdy qoldanýdyń arqasynda egin oraǵy ýaqytynda aıaqtaldy. Gektar túsimi 13 tsentnerden aınalyp, 166 myń tonna astyq jınaldy», - dep atap ótti Talǵat Edigenov.
Sonymen birge, aýdan ákimi agrarly aýdanda mal sharýashylyǵyna zor kóńil bólinip kele jatqandyǵyn atap ótti.
Talǵat Edigenovtyń aıtýynsha, jyl ishinde 3,5 myń tonna et, 17,7 myń tonna sút jáne 58 myń dana jumyrtqa óndirilgen.
«Astana qalasy aınalasynda azyq-túlik beldeýin damytý baǵytynda 7 joba júzege asyrylýda. Máselen, Dombyraly aýylynda «Bekqojın» jeke kásipkerligi 90 iri qara mal, Azat aýylynda «Saıası Qolǵanat» jeke kásipkerligi 50 iri qara mal satyp aldy. Mınskoe aýylyndaǵy «Bókeı ordasy» seriktestegi men Dombyraly aýylyndaǵy «Fermer» sharýa qojalyqtarynyń árbireýi 100 bastan iri qara mal, Keńes aýylyndaǵy «Sarydala» sharýa qojalyǵy 30 bastan iri qara mal satyp alýdy josparlap otyr», deıdi aýdan ákimi.
Sonymen qatar, kezdesýde aıtylǵandaı 2019 jyly «Eńbek» jaýapkershiligi shekteýli seriktestigi 1200 golshtın-frız tuqymdy sıyrlaryna arnalǵan sút-taýarly fermasyn ashý jobasyn júzege asyrýdy josparlap otyr.
