Elorda mańyndaǵy avtojoldarda jolaýshylardy qutqarý qalaı júrgiziledi
«Jedel áreket etý úshin jeke quramdaǵy 662 adam men 431 tehnıkasy bar qalanyń kúshteri men quraldary daıyndyqqa keltirildi. Qosymsha qajet bolǵan jaǵdaıda, qala ákiminiń sheshimimen bekitilgen quramynda 179 adam jáne 56 qutqarý, medıtsınalyq jáne ınjenerlik tehnıkasy bar qalanyń shuǵyl den qoıý jıyntyq jasaǵy ázirlikte bolady. Aqmola oblysy men Nur-sultan qalasynyń Tótenshe jaǵdaılar departamentteri arasyndaǵy 2020-2021 jyldarǵa arnalǵan «ózara kómek kórsetý boıynsha» bekitilgen Ózara is-qımyl josparyna sáıkes, perımetr boıynsha qalanyń shekaralary anyqtaldy jáne 50-40 shaqyrym radıýsta respýblıkalyq ári oblystyq mańyzy bar avtojoldardyń 6 baǵyty boıynsha sektorlarǵa bólindi», - dedi Baýyrjan Beısenqanov ákimdiktegi onlaın brıfıngide.
Onyń aıtýynsha, qajet bolǵan jaǵdaıda zardap shekken adamdar Aqmola oblysynyń aýmaǵyndaǵy respýblıkalyq jáne oblystyq mańyzy bar joldardyń boıyndaǵy medıtsınalyq-qutqarý pýnktterine ornalastyrylady. Zardap shekkenderdi 1000 orynǵa ýaqytsha jaıǵastyrýdyń 10 beketiniń daıyndyǵyna tekserý júrgizildi. Keıinnen adamdar qonaq úılerde, jataqhanalarda jáne hostelderde (500 oryn) ornalastyrylady. Qala aýmaǵynda uzyndyǵy 40 shaqyrym quraıtyn avtomobıl joldarynyń barlyq 16 qar basyp qalatyn ýchaskelerin qamtıtyn ahýaldyq karta ázirlendi. Esil jáne Almaty aýdandarynda qar ustaıtyn qalqandardy ornatý boıynsha jumystar júrgizilip jatyr», - dep atap ótti departament ókili.
Sonymen qatar, «Qazaqavtojol» JShS Nur-Sultan-Pavlodar jáne Nur-Sultan-Qostanaı avtojoldarynyń qar basatyn ýchaskelerinde 20 shaqyrymǵa deıin qar ustaıtyn qalqandardy ornatý boıynsha jumystar júrgizilýde.