Elorda mańyndaǵy aýdandarda 6 myńǵa jýyq ınfraqurylymsyz bos jer ýchaskeleri bar
ASTANA. QazAqparat - Elorda mańyndaǵy aýdandarda 6 myńǵa jýyq ınfraqurylymsyz bos jer ýchaskeler bar. Bul týraly «QazAqparat» agenttigine Aqmola oblysy ákimdiginen habarlandy.
«Aqmola oblysynyń Astana mańyndaǵy aýdandarda qazirgi tańda kezekke turǵandar sany 79 998-di quraıdy. Shortandy aýdanynda ǵana eldi mekenderdiń bas josparlaryna sáıkes, 295 jer telimderiniń ınfraqurylymmen, ıaǵnı sý jáne elektr jelisimen qamtamasyz etilgen. Oblystyń osy aýdandarynda (elorda mańyndaǵy) ınfraqurylymsyz bos jer ýchaskelerdiń sany - 5815, sonyń ishinde Arshaly aýdanynda - 1363, Shortandy - 2226, Tselınograd - 2266»,-delingen oblys ákimdigi málimetinde.
QR Jer kodeksiniń 44-1 babyna sáıkes, jeke turǵyn úı qurylysy úshin jer ýchaskeleri suralǵan kezde azamattardyń ótinishteri arnaıy esepke alynady jáne bólip beriletin alańdardyń daıyn bolýyna qaraı ne jeke turǵyn úı qurylysy úshin paıdalanylatyn bos aýmaqtar bar bolǵan kezde qanaǵattandyrylady. Bul rette eldi mekenniń bas josparlary negizinde oryndalǵan egjeı-tegjeıli josparlaý jobalary jáne qurylys jobalary, sondaı-aq oblystar aýmaqtaryn qala qurylysy úshin josparlaýdyń keshendi kesteleri bolmasa, jer ýchaskelerin qurylys úshin berýge tyıym salynady.
«Aldaǵy ýaqytta Astana qalasynyń sáýlet organdarymen elordalyq Aglomeratsııanyń syzbasy ázirlenedi jáne kelisiledi. Astananyń aýmaǵynda eldi mekenderdiń josparlaý qujattamalaryna túzetýler syzbany bekitkennen soń engiziledi»,-deıdi oblys mamandary.
