Elorda mańynda balyq aýlaýǵa bolatyn jasandy kólshik paıda bolady
«Prezıdent Qazaqstan halqyna Joldaýynda qorshaǵan ortany qorǵaý men ekologııa máselesi eldegi kún tártibiniń basyna shyǵatynyn aıtyp ótti. Mańyzdy mindettiń biri – el ishinde ekologııalyq týrızm mádenıetin belsendi túrde damytý. Bul rette elordada ekobaqtardy salý ekotýrızmdi damytýǵa serpin beredi. Jalpy ekologııayq amal – baqtyń vızıttik kartasyna, al bul amal kelýshilerdiń ekologııalyq tanym-túsinigin jaqsartýdyń negizine aınalatynyn atap ótý kerek», - dedi Nurlan Uranhaev.
Sonymen qatar Maıbalyq kóliniń shyǵys jaǵyna qaraı ekologııalyq baqty salý osynaý mekenniń tabıǵı amandyǵyn saqtap qana qoımaı, týrıstik jáne ekonomıkalyq áleýetin de ashatynyn jetkizdi.
Basqarma basshysynyń aıtýynsha ekologııalyq baqta balyq aýlaýǵa arnalǵan jasandy sý qoımasy paıda bolady. Odan bólek erekshe qorǵalatyn aýmaq, jaıaý jáne veloserýenge arnalǵan joldar, sportpen aınalysýǵa bolatyn, biregeı ekojúıeni qoldaýǵa arnalǵan aýmaqtar qurylady.
«Ekobaq mektepke deıingi balalar, oqýshylar men stýdentter úshin ǵylymı-tanymdyq alańǵa aınalýy múmkin. Ol jerde ǵylymı jáne tabıǵı jobalardy júzege asyrýǵa múmkindik bolady», - deıdi ol.
Qazirgi ýaqytta qala shetinde turǵyndar úshin yńǵaıly bolatyndaı tabıǵı baq joqtyń qasy. Sol sebepti osy ekobaqtyń qurylysyna erekshe nazar aýdarylǵaly otyr. Maıbalyq kólindegi ekinshi ekobaqtyń jalpy aýmaǵy 400 gektardy, al sý qoımasy 120 gektardy alady.