Elorda mańynda 3 ındýstrııalyq aımaq qurylady
ASTANA. QazAqparat - Elorda mańynda 3 ındýstrııalyq aımaq qurylady. Bul týraly búgin Úkimettiń selektorlyq rejimdegi otyrysynda QR Investıtsııalar jáne damý mınıstri Jeńis Qasymbek aıtty, dep habarlaıdy QazAqparat.
«Elordanyń qarqyndy damýy, demografııalyq syıymdylyq, óńir halqy tyǵyzdyǵynyń ósýi, kóshi-qon aǵymy, resýrstyq qor aglomeratsııalyq damýdyń alǵyshartyn quraıdy. Sonymen qatar halyq sanynyń ósýimen, kólik problemalarynyń kóbeıýimen jáne qorshaǵan ortanyń nasharlaýyna baılanysty qala mańy aımaǵynyń máselesi artyp tur. Basqarylatyn ýrbanızatsııany damytý jáne ekonomıkany ártaraptandyrý úshin qolda bar resýrstardy eskere otyryp, osy protsesterdi memlekettik qala qurylysynyń retteýi talap etiledi», - dedi mınıstr.
Onyń aıtýynsha, Astana aglomeratsııasynyń aýmaǵyna Astana qalasy, Aqmola oblysynyń Arshaly, Tselınograd, Shortandy aýdandary jáne Aqmola oblysy Aqkól aýdanynyń 4 okrýgi kiredi. Aglomeratsııaǵa barlyǵy 124 eldi meken jatady.
Aglomeratsııa halqynyń sany 2016 jyly 1,2 mln. adamdy quraıdy jáne 2030 jylǵa qaraı 1,6 mln. adamǵa deıin jetedi dep boljanýda. Ósim 33 paıyzdy quraıdy. Bul tsıfr ózgerýi de múmkin. Jalpy alańy 21 770 sharshy shaqyrymdy quraıdy. Sonyń ishinde Astana qalasy - 800 sharshy shaqyrym. Aglomeratsııanyń jalpy aýmaǵynan 7,5 myń sharshy shaqyrymdy quraıtyn qarqyndy damý aımaǵy jeke bólingen. Onyń negizgi baǵyttary - ındýstrııalyq aımaqtardy qurý, óndiristi ártaraptandyrý», - dedi ol.
Sondaı-aq, Jeńis Qasymbektiń sózine qaraǵanda, rekreatsııany damytý men azyq-túlikti damytý aımaǵy bólingen. Bul eldi mekender Astanamen tyǵyz baılanysta. Tarıhı jaǵynan makroóńir aýyl sharýashylyqqa mamandanýmen sıpattalady. Sondyqtan Astana aglomeratsııasy atqaratyn qyzmettiń biri Astana úshin azyq-túlik beldeýi qyzmetin atqarý bolyp tabylady.
«Kontrmagnıtter men ındýstrııalyq aımaqtardy qurý Astanany halyq sany jaǵynan biraz «jeńildetip», syrtqy kóshi-qon aǵyndaryn ózine «tartýǵa» múmkindik beredi. Negizgi kólik dálizderi boıynsha qonystandyrý arnalary men qalalar aıqyndaldy - Arshaly kenti, Shortandy kenti men Jaınaq stantsııasy negizindegi kontrmagnıtter. Sonymen qatar kontrmagnıtter retinde Aqkól qalasy men Aqmol aýyly anyqtaldy. Olar ózek-qaladan qashyq ornalasqan jáne kóshi-qon aǵymdaryn ózine tartatyn jetkilikti resýrstary bar. Halyqtyń erkin qozǵalysy, ózektiń keleshegi bar ósim núktelerimen baılanysy negizgi magıstral joldardyń kómegimen qamtamasyz etilýi tıis. Óndiris pen qajetti óndiristik ınfraqurylymnyń kontrmagnıt jáne seriktes eldi mekenderde shoǵyrlanýy ozyq qarqynmen ósip kele jatqan aýmaqtardy qalyptastyrýǵa múmkindik beredi, olar Arshaly aýdanynyń Arshaly, Shortandy aýdanynyń Tóńkeris jáne Tselınograd aýdanynyń Jaınaq ındýstrııalyq aımaqtary bolmaq. Bul ónerkásip ónimi óndirisiniń 144 paıyzǵa ósýin qamtamasyz etedi», - dedi mınıstr.
