Elorda mańynda 11 qar polıgony belgilendi
NUR-SULTAN. QazAqparat – Elorda mańynda 11 qar polıgony belgilendi. Bul týraly Nur-Sultan qalasy Tótenshe jaǵdaılar departamenti basqarmasynyń basshysy Baýyrjan Beısenqanov málim etti, dep habarlaıdy QazAqparat tilshisi.
«Bıyl qala boıynsha 11 qar polıgony aıqyndaldy. Bıylǵy 22 jeltoqsandaǵy jaǵdaı boıynsha qala aýmaǵynan 325 686 tekshe metr qar shyǵaryldy, 8 580 tekshe metr qum-tuz qospasy tóseldi. Kún saıyn qalanyń joldary men kóshelerinde «Astana Tazalyq» JShS-niń 500-den astam tehnıkasy men 400 astam jumysshysy eńbek etedi. Onyń negizinde 14 myń tekshe metr qum-tuz qospasy jáne 350 tonna kóktaıǵaqqa qarsy reagent daıyndaldy», - dedi Baýyrjan Beısenqanov ákimdiktegi onlaın brıfıngide.
Onyń aıtýynsha, 2020 jyldyń 22 jeltoqsanyndaǵy jaǵdaı boıynsha «Astana-Energııa» AQ-nyń kómir qory 325 647 tonnany qurady (JEO-1- 43 554 tonna, JEO-2- 282 093 tonna).
«2019-2020 jyldar kezeńinde qala boıynsha 105 qar tazalaý tehnıkasy satyp alyndy. Sonymen qatar, 2020 jyldyń sońyna deıin «Astana-Tazalyq» JShS qosymsha 70 qar tazalaý tehnıkasyn satyp alýdy josparlap otyr», - dedi departament ókili.
Budan buryn habarlanǵandaı, Baýyrjan Beısenqanov elorda mańyndaǵy avtojoldarda jolaýshylardy qutqarý beketteri týraly aıtqan bolatyn.
