Elorda mańyndaǵy ózen-kólderdi qoqystan tazartý ekologııalyq aktsııasy ótti
ASTANA. KAZINFORM – Búgin elordada dúnıejúzilik «World Cleanup Day» tazalyq aktsııasy aıasynda «Kóldi aıala» ekologııalyq is-sharasy uıymdastyryldy.
«QR Mádenıet jáne aqparat mınıstrliginiń qoldaýymen senbilik uıymdastyrdyq. Bul is-shara elimizdiń aýmaǵyndaǵa ózender men kólderdi qoqystan tazalaýǵa arnalǵan. Sondyqtan osy senbilikke Qazaqstandaǵy volonterlerdi, turǵyndardy, memlekettik organdar men kvazımemlekettik sektordyń qyzmetshileri jumyldyrylyp otyr», - dedi Birgemiz: Taza Álem jalyulttyq jobasynyń menedjeri Aıdana Galımova.
Onyń aıtýynsha, elimizdiń aýmaqtaryn tazalaýǵa jáne abattandyrýǵa baǵyttalǵan jalpyulttyq ekologııalyq bastama – «Taza Qazaqstan» aktsııasy ótkizilip keledi. Bul turǵyda «Taza Qazaqstan» aıasynda ekologııalyq volonterler barynsha áreket etip jatyr.
«Búgin bizdiń bastamamen 100-den astam adam qala aýmaǵyndaǵy eki jerdegi senbilikke qatysty. Jınalǵandardyń bir bóligi Taldykól mańyn tazartyp jatyr. Taldykól - qaladaǵy ekologııalyq mańyzdy aýmaqtardyń biri. 2021 jyly biz osyndaı aktsııany ótkizgen edik, bıyl sony jalǵastyrdyq. Jyl sońyna deıin qala aýmaǵyndaǵy ózen-kólder men sý qoımalary mańyn tazalaýǵa nazar aýdaryp otyrmyz», - dedi A.Galımova.
Senbilikke kelgen sol mańdaǵy úılerdiń turǵyndary men volonterler, túrlik kompanııalardyń ókilderi Taldykól jaǵasymen júrip, qoqystardy arnaıy oryndarǵa jınastyrdy.
«QazMunaıGaz» kompanııasynyń eriktisi Baldyrǵan Ómirbekova «Kóldi aıala» ekologııalyq is-sharasyn qoldaýǵa bir top áriptesterimen birge kelgenin aıtty.
«Qala turǵyny retinde shahardaǵy ekologııalyq tazalyqqa erekshe mán berip otyrmyz. Sondyqtan turǵyndardy osyndaı senbilikke kóptep shyǵýǵa shaqyramyz. Elordada mańynda ormandy jerler de, sý qoımalary, túrli saıabaqtar bar. Osy barlyq alqapta tazalyq bolýy kerek. Turǵyndar men qala qonaqtary bul nysandardy osy taza qalpynda saqtaý úshin keler urpaqqa úlgi bolýy tıis», - dedi «QazMunaıGaz» velonteri.
