Elorda mańyndaǵy 2026 jylǵy jazǵy demalys aımaqtary: baǵalar qandaı
ASTANA. KAZINFORM – Turaqty ystyqtyń bastalýymen Astana mańyndaǵy demalys oryndary qaıtadan jazǵy demalystyń eń suranysqa ıe baǵyttarynyń birine aınaldy. Elordadan bir saǵattyq jerde ornalasqan ondaǵan keshen basseınderimen, jaǵajaılarymen jáne monsha aımaqtarymen kelýshilerdi tartýǵa tyrysyp, qyzmet sapasy men baǵa jaǵynan ózara básekege túsip jatyr.
Kazinform agenttiginiń tilshisi qala mańyndaǵy demalys oryndarynyń usynystaryn saralap, eresekter men balalar úshin jazǵy demalystyń quny qansha ekenin jáne baǵalardyń óńirler boıynsha qalaı bólinetinin anyqtady.
Qosshy qalasy jazǵy demalys oryndary eń kóp shoǵyrlanǵan aımaqtardyń biri
Jazǵy demalystyrdyń negizigi ortalyqtarynyń biri retinde Qosshy qalasy men oǵan jaqyn ornalasqan eldi mekender. Munda qoljetimdi de, premıým sanattaǵy da birneshe tanymal keshen jumys isteıdi.
Olardyń qataryndaǵy eń qoljetimdi nysandardyń biri – «Saıajaı» (Qosshy qalasy). Munda jumys kúnderi eresekter úshin kirý quny – 8000 teńge, al balalarǵa – 4000 teńge. Demalys kúnderi baǵa tıisinshe 10 000 jáne 5 000 teńgeni quraıdy. Keshende basseın bar jáne kelýshiler sany boıynsha eń tanymal oryndardyń biri sanalady.
Osyǵan uqsas baǵa sanatynda «Tau Park» ornalasqan. Jumys kúnderi eresekter úshin bılet quny – 6000 teńge, balalar úshin 3000 teńge. Demalys kúnderi baǵa eki esege ósip, tıisinshe, 12000 jáne 6000 teńgeni quraıdy. Nysannyń basty ereksheligi – aýmaǵy 1200 sharshy metr bolatyn iri sý aımaǵy.
Al «Pıknık» demalys kesheni kúnge qaramastan birdeı tarıf usynady: eresekter úshin – 7000 teńge, balalar úshin – 3500 teńge.
Sondaı-aq osy aýdandaǵy «River Club» kesheninde eresekter úshin kirý quny jumys kúnderi 6000 teńgeden bastalyp, demalys kúnderi 8000 teńgege deıin jetedi. Balalar bıleti 4000-nan 6000 teńgege deıin ózgeredi. Munda jaǵajaı aımaqtary da qarastyrylǵan.
Neǵurlym joǵary sanattaǵy demalysty qalaıtyndar úshin «Chıstye Prýdy» kesheni jumys isteıdi. Munda eresekterge arnalǵan bılet – 12000 teńge, balalarǵa - 7 000 teńge. Keshen basseın men jaǵajaı ınfraqurylymyn qatar usynady.
Jibek joly baǵyty men Astana – Qaraǵandy tasjolynda ornalasqan iri keshender
Jibek joly aýyly men Astana-Qarǵandy tasjoly boıynda da jazǵy demalys oryndarynyń úlken shoǵyry qalyptasqan. Bul baǵyttaǵy keshender kelýshiler sany jaǵynan da, qyzmet túrleri jaǵynan da erekshelenedi.
Jibek joly aýylyndaǵy «Primevill» kesheninde jumys kúnderi eresekter men balalar úshin kirý quny 6000 teńgeni quraıdy. Demalys kúnderi eresekterge arnalǵan bılet baǵasy 10000 teńgege deıin kóteriledi.
Osy baǵytta ornalasqan «Jansaya Resort» kesheninde eresekter úshin biryńǵaı tarıf – 12000 teńge, balalar úshin – 7000 teńge. Baǵaǵa basseınder men monsha aımaqtaryn paıdalaný kiredi.
Al «Beibarys» demalys kesheninde eresekter úshin bılet quny jumys kúnderi 10000 teńge, demalys kúnderi 12000 teńge bolsa, balalar úshin tarıf kúnge qaramastan 7000 teńge deńgeıinde saqtalady.
Tasjol boıyndaǵy jańa ári iri nysandardyń biri sanalatyn «Aqbozat» kesheninde eresekter úshin kirý quny – 15000 teńge, balalar úshin – 7500 teńge.
Talapker, Qajymuqan jáne Aqqaıyń: ortasha baǵa segmenti
Elorda mańyndaǵy bul baǵyttarda da baǵasy ortasha deńgeıdegi demalys oryndary jetkilikti.
«Picnik Talapker» kesheninde jumys kúnderi eresekter úshin bılet quny – 6000 teńge, balalar úshin – 3000 teńge. Demalys kúnderi baǵa tıisinshe 7000 jáne 3500 teńgege deıin ósedi.
Qajymuqan aýylyndaǵy «Ayan Park» kesheni eresekter úshin 6000 teńge, balalar úshin 3000 teńge kóleminde turaqty tarıf usynady.
Malotımofeevka mańyndaǵy «Orman Park» kesheninde eresekter úshin bılet quny 5000-nan nan 7000 teńgege deıin ózgeredi, balalar úshin – 3000 teńge. Munda A-frame úlgisindegi demalys úıleri de qarastyrylǵan.
Óńirdegi eń aýqymdy jobalardyń biri – «BalQaragai» kesheni. Munda jumys kúnderi eresekter úshin kirý quny 12000 teńge bolsa, demalys kúnderi 18000 teńgege deıin jetedi. Balalar bıleti 8000-nan 10000 teńgege deıin ózgeredi. Keshen quramynda akvapark jumys isteıdi jáne óńirdegi eń iri demalys oryndarynyń biri bolyp sanalady.
Qalaǵa jaqyn ornalasqan demalys oryndary
Qaladan alysqa shyqpaı-aq demalǵysy keletinder úshin Astanaǵa jaqyn ornalasqan birneshe nysan bar.
«Teplo» kesheni (Mega Silk Way saýda ortalyǵynan 10 mınýttyq jerde) premıým sanatqa jatady. Munda eresekter úshin bılet quny jumys kúnderi 14000 teńge, demalys kúnderi 18000 teńgege deıin barady. Balalar bıleti 10000 teńgege deıin jetedi. Sý temperatýrasy turaqty túrde 27–28 gradýs deńgeıinde saqtalady.
Al Alash tasjoly boıyndaǵy «Tengovka» kesheninde eresekter úshin bılet quny 10000-12000 teńge aralyǵynda bolsa, balalar úshin 5000-7000 teńgeni quraıdy.
Aqqaıyń aýylyndaǵy «Monaco» demalys orny ortasha baǵa segmentine jatady. Munda eresekter úshin kirý quny 7000 – 8000 teńge, balalar úshin 5000–6000 teńge kóleminde belgilengen.
Jalpy, Astana turǵyndary men qonaqtary úshin tańdaý keń: qarapaıym basseınderden bastap jaǵajaıy men akvaparki bar iri keshenderge deıin túrli nusqa usynylǵan. Sondyqtan jazǵy demalysty josparlaý kezinde basty másele tańdaý emes, jaılylyq pen qosymsha qyzmetter úshin qansha qarajat jumsaýǵa daıyn ekenińizge baılanysty bolmaq.
Aıta keteıik, balalardyń jazǵy demalysynda ishki týrızm men otbasylyq saıahattardy damytýǵa basymdyq beriledi.
