Elorda qutqarýshylary táýlik boıy kezekshilikke kóshti
ASTANA. KAZINFORM — Jazǵy mezgiliniń bastalýymen elordanyń sý aıdyndarynyń jaǵalaýyna saýyq quryp baratyndar sany artady. Osyǵan baılanysty Astana qalasynyń Tótenshe jaǵdaılar departamenti sýdaǵy jazataıym oqıǵalardyń aldyn alý jáne azamattardyń qaýipsizdigin qamtamasyz etý maqsatynda profılaktıkalyq jáne jedel is-sharalar keshenin kúsheıtti. Bul týraly elordanyń Kommýnıkatsııalar qyzmetinde ótken brıfıngte Astana qalasy tótenshe jaǵdaılar departamentiniń azamattyq qorǵanys basqarmasynyń bastyǵy Renat Smaǵulovqa silteme jasap, Astana qalasynyń ákimdigi jazdy.
Onyń aıtýynsha, júrgizilip jatqan jumystyń negizgi maqsaty — shomylý maýsymynda adamdardyń qaza bolýy men jaraqattanýynyń aldyn alý, turǵyndardyń sýdaǵy qaýipsizdik erejeleri týraly habardarlyǵyn arttyrý.
— Sý aıdyndaryndaǵy tótenshe jaǵdaılarǵa jedel áreket etý úshin Astana qalasynyń Tótenshe jaǵdaılar departamenti qutqarý bólimsheleriniń daıyndyǵyn qamtamasyz etti. Qazirgi ýaqytta táýlik boıy kezekshilikte 30 qutqarýshy-súńgýir qyzmet atqarady. Sonymen qatar arnaıy súńgýir jabdyqtarymen jabdyqtalǵan 2 jedel-qutqarý tehnıkasy jáne 8 júzý quraly turaqty jaýyngerlik ázirlikte tur. Kún saıyn qutqarýshylar Esil ózeniniń arnasyn qaıyqtarmen patrýldep, jaǵdaıdy baqylap, jedel áreket etedi. Budan bólek, qaýipti ýchaskelerde júzý quraldarymen jabdyqtalǵan úsh mobıldi beket qoıylǵan. Oqys oqıǵalardyń aldyn alý maqsatynda Tótenshe jaǵdaılar departamenti aýdan ákimdikterimen birlesip turǵyndardy aqparattandyrý jumystaryn júrgizýde. Sý aıdyndarynyń qaýipti jáne jabdyqtalmaǵan ýchaskelerinde shomylýǵa tyıym salý týraly aqparattyq stendter men eskertý belgileri ornatylǵan, — deıdi Renat Smaǵulov.
Sonymen qatar balalar men jastar arasynda profılaktıkalyq jumystarǵa basty nazar aýdarylýda. Elordanyń mektepterinde, kolledjderi men joǵary oqý oryndarynda jazǵy demalys kezindegi qaýipsizdik máseleleri boıynsha ınteraktıvti sabaqtar men túsindirý is-sharalary uıymdastyrylmaq.
Astana qalasy ákimdiginiń qaýlysyna sáıkes, azamattardyń sý aıdyndarynda shomylýyna arnalǵan 5 jaǵajaı aımaǵy bekitilgen. Olardyń qatarynda Ortalyq saıabaqtaǵy Ortalyq jaǵajaı, Sh. Beısekova kóshesindegi kópir mańyndaǵy kommýnaldyq jaǵajaı, Kóktal-1 turǵyn alabyndaǵy «Trı peskarıa», «Armına» jáne «Stolıchnyı dvor» jaǵajaı aımaqtary bar. Atalǵan aýmaqtar belgilengen talaptarǵa saı keledi jáne shomylý maýsymynda azamattardyń qaýipsiz demalysyna arnalǵan. Qalǵan sý aıdyndary ruqsat etilmegen aýmaq bolyp sanalady jáne onda sýǵa túsýge tyıym salynǵan.
Turǵyndar men qala qonaqtaryna yńǵaıly bolý úshin ruqsat etilgen demalys oryndary týraly aqparat 2GIS kartografııalyq platformasynda ornalastyrylǵan. TJD sýdaǵy qaýipsizdik talaptaryn buzý Qazaqstan Respýblıkasynyń Ákimshilik quqyq buzýshylyq týraly kodeksiniń 364 jáne 412-baptaryna sáıkes ákimshilik jaýapkershilikke ákeletinin eskertedi. Atap aıtqanda, ótken jyldyń jazǵy maýsymynda TJD qyzmetkerleri polıtsııa qyzmetkerlerimen birlesip júrgizgen reıdter barysynda ruqsat etilmegen sý aıdyndarynda shomylǵan azamattarǵa qatysty 176 ákimshilik hattama toltyrylǵan.
— Sýdaǵy adamdardyń óliminiń barlyq jaǵdaıy ruqsat etilmegen shomylý oryndarynda tirkelgen. Qaıǵyly oqıǵalardyń negizgi sebepteri — sý aıdyndaryndaǵy qaýipsizdik erejelerin saqtamaýdan bolǵan. Atap aıtqanda, sý aıdyndarynyń jabdyqtalmaǵan ýchaskelerinde shomylý, mas kúıinde shomylý jáne balalardy eresekterdiń qaraýynsyz qaldyrý. Astana qalasynyń Tótenshe jaǵdaılar departamenti elorda turǵyndary men qonaqtaryn sý aıdyndarynda shomylý kezinde qaýipsizdik erejelerin qatań saqtaýǵa shaqyrady. Qarapaıym saqtyq sharalaryn saqtaý arqyly kóptegen jazataıym oqıǵanyń aldyn alýǵa bolady. Azamattarǵa tek arnaıy jabdyqtalǵan jáne ruqsat etilgen oryndarda ǵana sýǵa túsý usynylady. Sonymen qatar alkogoldik ishimdik ishken kúıde sýǵa túsýge bolmaıdy. Belgilengen shekteýlerdi saqtaý, qorshaýlardan aspaý, kópirlerden, júzý quraldarynan jáne sýǵa túsýge arnalmaǵan ózge de nysandardan sekirmeý qajet, — deıdi spıker.
Eske sala keteıik, buǵan deıin Óskemende sýǵa shomylýǵa jabdyqtalmaǵan jerde eki adam sýǵa batyp ketkenin jazǵan edik.
