Elorda qurylystarynda klımat jaǵdaıy qanshalyqty eskerilip jatyr
NUR-SULTAN. QazAqparat – Qysy men jazynda 80 gradýstyq aıyrmashylyq bar Nur-Sultan (qysta -40, jazda +40) qalasynda ǵımarat salynǵanda klımattyq jaǵdaı qanshalyqty eskeriledi? Shyny nemese plıtamen qaptalǵan ǵımarattar qanshalyqty tózimdi? QazAqparat agenttiginiń resmı saýalyna Nur-Sultan qalasynyń ákimdigi jaýap berdi.
«Búkil álemde osyndaı qurylys materıaldary (shyny men plıta- avt.) qoldanylady. Barlyǵy qoldanylatyn materıaldardyń sapasyna, quramyna baılanysty. Nur-Sultanda belgili bir nysandy turǵyzý barysynda klımat erekshelikterin erekshe eskeriledi. Zamanǵa saı materıaldar ǵana qoldnnylady. Jobada kórsetilgen materıaldyń sáıkestigin qalalyq orta sapasy jáne baqylaý basqarmasy baqylaıdy», - dedi saýalǵa elorda ákimdiginen.
Ákimdik kez-kelgen materıal ýaqyt óte kele tozatynyn, onyń sapasy men túrine baılanysty 10-50 jyldan keıin jańartýdy talap etetinin atap ótedi.
«2013 jyly qalany damytý jónindegi otyrystardyń birinde QR Tuńǵysh Prezıdenti Nursultan Nazarbaev elordada tabıǵı tastardan – travertın, granıt, mármárdan jasalǵan joǵary sapaly materıaldardy ǵana qoldanýdy tapsyrdy. Budan keıin qurylys salýshylar olardy jıi qoldana bastady», - delingen jaýapta.
Sonymen qatar, qala basshylyǵy jalpy qaladaǵy ǵımarattardyń kórkemdigin, kútip ustalýyn kim qadaǵalaıtynyn túsindirip berdi.
«Meıram kezinde ǵımarattardyń syrtqy bezendirilýine aýdan ákimdikteri jaýapty. Qurylys salýǵa josparlanǵan nysandardyń eskızdik jobasyn Sáýlet, qala qurylysy jáne jer qatynastary basqarmasy kelisedi. Bul rette ǵımarattardyń jalpy stılıstıkasy, «qyzyl syzyqtardyń» saqtalýy, tyǵyzdyǵy, qabattylyǵy, órtke qarsy talaptardyń saqtalýy eskeriledi. Nysandy salý barysyn tapsyrys berýshi, avtorlyq jáne tehnıkalyq qadaǵalaý, sondaı-aq merdiger júrgizedi. Qalalyq orta sapasy jáne baqylaý basqarmasy baqylaý júrgizedi. Nysan paıdalanýǵa engizilgennen keıin turǵyn úı keshenderiniń laıyqty jaǵdaıyna PIK, al eger ákimshilik ǵımarat bolsa – onyń menshik ıesi jaýap beredi», - delingen ákimdiktiń jaýabynda.
Eske sala ketsek, Prezıdent Qasym-Jomart Toqaev elordany odan ary damytý máseleleri jónindegi májilisinde qalanyń syrtqy kelbetine qatysty syn aıtqan bolatyn.
«Elordada qala qurylysynyń biryńǵaı saıasaty joq. Bul, birqatar aýdanda retsiz, beıbereket qurylystarǵa alyp keledi. Kósheler men ǵımarattardy rásimdeýdiń biryńǵaı úılesimdi stıli joq. Sizder elordany kórý úshin arnaıy kelgen týrısterdiń pikirlerin estigen de shyǵarsyzdar. Tolyqtaı alǵanda, olar árıne, oń pikirler. Biraq, qalada eklektıkanyń da joqtyǵyn atap ótedi. Bir ǵımarat bir stılde, ekinshisi basqa stılde salynǵan. Eń bastysy, jaılylyq joq. Plıtalary ushyp, asfalt jarylyp jatyr. Jasyl óskin az. Jalpy, qalany qadaǵalap, kútip ustamaıtyndaı sezim qalyptasady. Qojaıyny joq», - degen edi Qasym-Jomart Toqaev.
