ELORDA QURDASTARY: Astanaǵa súıispenshiligim arta túsýde

Bul pikirdi QazAqparat tilshisine elorda qonaǵy, Aqtóbe oblysy Shalqar qalasynyń № 5 orta mektebiniń túlegi Aıgerim Aqsholaqova bildirdi.

«Elimizdiń bas qalasy Astana búgin 18 jasqa toldy. Elordamyzda bul merekege baılanysty qyzyq daıyndyq júrgizizgenine kýá boldym. Jyl saıyn bul meıram Qazaqstannyń túkpir-túkpirinen de, shet elderden de myńdaǵan týrısterdi jınaıdy. Bul sharanyń kólemi de, sapasy da, deńgeıi de jyldan-jylǵa jańa satyǵa kóterilýde. Jaqynda qala ákimshiliginde bolǵan ózgeristerge qaramastan, merekelik baǵdarlamanyń kestesi ýaqynda daıyn bolady. Bıylǵy daıyndalǵan baǵdarlama mazmuny keń»,-  dedi ol.

Qala qonaǵy mereke shymyldyǵyn 20-26 maýsym arasynda ótken «Sahnadan sálem» teatr festıvali ashqandyǵyn, bul festıvalge elimizdiń jáne Reseı men Ýkraına sahnalarynyń maıtalmandary qatysqanyn eske saldy.  Bıyl Astana qonaqtary «Azııa jańǵyryǵy» tsırk óner festıvalin, mýzyka salasynyń úzdikteri qatysatyn «Astana Arqaý» festıvalin tamashalaǵandyǵyn atap ótti. Sonymen qatar, Astana qonaqtary tehnıkalyq 3D shoýdy, ázil-syqaq keshterdi, «Qymyzmuryndyq» festıvalin, halyq aspaptar orkestriniń «Serper» mýzykalyq festıvalin, aqyndar aıtysyn, «MýzArt» tobynyń shyǵarmashylyq kontsertin tamashalaı alatyndyǵyn aıryqsha aıtty. Osy jyly «Qymyzmuryndyq» festıvali Qazaqstanda birinshi ret ótpek. Bul festıval barysynda kórermender iriktelgen qymyz ben tátti baýyrsaq dámin tatýlaryna bolady.

«Elbasynyń qoldaýy arqasynda elimizde sport salasyna kóp mańyz bólinýde. Sol sebepti, mańyzdy is-sharalarda sporttyq jarystar baǵdarlamanyń ajyramas bóligi bolyp sanalady. Astanamyzdyń týǵan kúninde de sport salasyna basa nazar aýdarylǵan. Sporttyq sharalardan halyqaralyq jaýyngerlik óner festıvali, dýatlonnan qalalyq týrnır, asyq atý men qazaq kúresinen Qazaqstan barysyn ótkizildi»,-  dedi A.Aqsholaqova.

Sonymen qatar ol óz sózinde Astana kúni - elimizdiń deńgeıinde ǵana emes,  halyqaralyq deńgeıde toılanatyn meıramǵa aınalyp otyrǵandyǵyn aıtty. «Mysaly, baýyrlas Túrkııanyń Ankara qalasynda Astana kúnine oraı qazaqstandyq ónerpazdardyń qatysýymen merekelik kontsert ótti. Elimizden bul kontsertke «Adyrna» folklordyq-etnografııalyq ansambli men «Altynaı» memlekettik halyq bı ansambli qatysty. Sonymen qatar, elorda tórindegi merekege úlesterin ózge memleketter de atsalysý ústinde.  Onyń bir dáleli AQSh elshiliginiń Astanaǵa «Brodway Bound» mıýzıklin ákelýi, ekinshisi Italııa elshiliginiń «Astana Samaly» úrmeli aspaptar orkestrleriniń festıvaline qatysatyn tý kóterip júretinderdi ákelýi. Munyń bári - elimizde ulttar birliginiń nyǵaıýy men Qazaqstannyń álemdik saıası arenada úlken ról atqaratynyń kórinisi», - dep túıindedi sózin ol.