Elorda kúniniń barlyq is-sharalary tek onlaın rejımde ótedi

NUR-SULTAN. QazAqparat - Epıdemıologııalyq ahýalǵa baılanysty buǵan deıin elorda kúnine josparlanǵan barlyq is-sharalar toqtatyldy. Sharalar tek onlaın rejımde ótedi, dep habarlaıdy QazAqparat qalalyq ákimdiktiń resmı saıtyna silteme jasap.

Mysaly «Dombyra kúni» sharasyn turǵyndar Qazaqstan telearnasynan onlaın rejımde tamashalaı alady. Іs-sharalardyń kópshiligi áleýmettik sıpatta bolady – erekshe qajettilikteri bar balalarǵa arnalǵan reabılıtatsııalyq ortalyq, jumyssyz áıelderge ShOB negizderin úıretetin «Kásipker ana» áleýmettik ortalyǵy, Jaǵalaý aýdanynda jedel járdem stansasy men «Doktor ý doma» medıtsına ortalyǵy jáne basqa da áleýmettik nysandardyń ashylýy bolady. Sharalarǵa qatysatyn adamdar sany shektelgen. Sonymen qatar úı kezegindegiler men úleskerlerge páter kiltteri tapsyrylady – qatysýshylar sany shekteýli jáne sanıtarlyq normalar qatań saqtalady: maska taǵyp, áleýmettik qashyqtyqty saqtaý kerek.