Elorda kúnine oraı «Azııa jańǵyryǵy» atty halyqaralyq tsırk óneriniń festıvali ótedi
STANA. Maýsymnyń 24-i. QazAqparat /Marlan Jıembaı/ - Elorda kúnine oraı maýsymnyń 26-sy men shildeniń 12-si aralyǵynda «Azııa jańǵyryǵy» atty halyqaralyq tsırk óneriniń festıvali ótedi. Bul týraly búgin Astanalyq tsırk ǵımaratynda birqatar sheteldik tsırk óneriniń maıtalmandarynyń qatysýymen ótken baspasóz máslıhaty barysynda atalǵan mekemeniń bas dırektory, Qazaqstannyń eńbek sińirgen ártisi Bekbolat Baısaǵatov málim etti.
Onyń atap ótýinshe, búgin saǵat 20:00-de Astana kósheleri arqyly úrlemeli orkestrdiń súıemeldeýimen festıvalǵa qatysýshylardyń Kavalkada merekelik sherýi tsırk janynan bastalyp, Saryarqa, Bógenbaı, Respýblıka dańǵyldary arqyly ótpek.
Festıval baǵdarlamasynda úndi pilderi, ýssýrııa jolbarystary, afrıkalyq arystandar, túıeler, attar, sondaı-aq Kenııa men Qytaıdan kelgen ártisterdiń biregeı akrobatıkalyq kórinisteri, áýede óner kórsetetin ártister jáne saıqymazaqtardyń ónerleri kórermen nazaryna usynylady. Mádenı is-sharaǵa qatysýshylardyń arasynda Máskeý, Qytaı, Latyn Amerıkasy, Monte-Karloda ótken halyqaralyq baıqaýlardyń júldegerleri men laýreattary bar.
Astana qalasy ákimdiginiń qoldaýy arqasynda aǵymdaǵy jyly festıvalge 12 eldiń, atap aıtqanda TMD elderimen qatar Kenııa, Polsha, Qytaı, Rýmynııa, Italııa memleketteriniń tsırk óneri maıtalmandary qatyspaq. Buǵan deıin eki márte ótken festıvalge 3 jáne 5 memlekettik ónerpazdary qatysqan bolatyn.
Baspasóz máslıhatyna Máskeýdegi úlken tsırktiń dırektory Erjı Kozıak, Polshanyń eńbek sińirgen ártisi, pilderdi tsırk ónerine jattyqtyrýshy Sergeı Gýlevıch, kenııalyq ártis Mýnoma Stıfen, ıtalııandyq ártis Djıno Frankını syndy tsırk óneriniń maıtalmandary qatysty.
