Elorda kúnine oraı áıel áskerı qyzmetshiler qaıyrymdylyq aktsııasyn ótkizdi (FOTO,VIDEO)

ASTANA. QazAqparat - Elorda kúnine oraı Qazaqstan Qarýly Kúshteriniń áıel áskerı qyzmetshileri Astanada qaıyrymdylyq aktsııasyn ótkizdi.

 «Batyr arýlar» baıqaýynyń jeńimpazdary kóp balaly jáne az qamtylǵan otbasylardyń balalaryna parohodta erekshe mereke uıymdastyrdy, dep habarlaıdy QR QM baspasóz qyzmeti.

Bul kúni 30-dan asa qyz bala men er balalar Esil jaǵalaýynda shaǵyn saıahatqa attandy. Áskerı qyzmetshiler Qazaqstannyń astanasymen baılanysty tanymdyq maǵlumattar aıtty, áskerı taqyrypta oı-tanymdyq jáne qyzyqty  vıktorınalar, akvagrım ótkizdi jáne balalarǵa estelik syılyqtar syıǵa tartty. Al oıyndar men vıktorınalar aıaqtalǵannan keıin balalar áıel áskerı qyzmetshiler pisirgen tátti tosyn syıdan aýyz tıdi. 

«Biz balalarǵa mereke syıladyq jáne ózimiz de jylýlyq sezimine bólenip, bir serpilip qaldyq. Balalar - bizdiń bolashaǵymyz.Keı óńirde áskerı qyzmetshiler qamqorlyqqa alǵan balalar úıi men qarttar úıi bar.  Bizdiń áskerı bólim balalarǵa arnap jıi shaǵyn mereke jáne is-sharalar uıymdastyryp turady», - deıdi 68665 áskerı bóliminiń áskerı qyzmetshisi serjant Sandı Smaǵulova.

Armııa men áskerı tehnıka týraly jumbaqtarǵa er balalar belsene jaýap berdi.  Ózderiniń balalaryn alyp júrgen ata-analar da bul aktsııany jaqsy qabyldady. «Áskerı qyzmetshiler - óskeleń urpaq úshin úlgi. Kóptegen er balalar men qyzdar áskerı adam bolýdy armandaıdy. Sondyqtan osyndaı qyzyqty kezdesýlerdi ótkizip turǵan paıdaly», - dep atap ótti olar.