Elorda kúninde merekelik otshashý bolmaıdy
NUR-SULTAN. QazAqparat - Bıyl elorda kúnine oraı Nur-Sultan qalasynda shamamen 108 is-shara ótedi, onyń 80-nen astamy tegin, dep habarlaıdy QazAqparat qala ákimdiginiń saıtyna silteme jasap.
Atap óter jaıt, bıylǵy baǵdarlama áleýmettik baǵytqa arnalǵan jáne kórermen kɵp qatysady dep josparlanyp otyr. Sondaı-aq, astana kúnin merekeleý aıasynda ótetin aqyly kontsertter men teatrlandyrylǵan qoıylymdardyń bıletterin satýdan túsken qarjy qaıyrymdylyq maqsattarǵa jumsalady. Kontsert uıymdastyrýshylary bılet satýdan túsken qarjy Arys qalasynyń zardap shekken turǵyndaryna arnalǵan kómek qorynyń shotyna aýdarylatyn bolady.
Bul baǵytta 29 maýsym kúni bolǵan"Astana Arena" stadıonynda ótken Dımash Qudaıbergenniń "Arnaý" atty jeke kontserti, aty ańyzǵa aınalǵan máskeýlik "Sovremennık" teatrynyń gastroli, Tursynbek Qabatovtyń "KTA" jobasy, jáne taǵy basqalaryn atap ótýge bolady. Sonymen qatar, qala kúni aıasynda Esil ózeniniń jaǵalaýynda, Abylaı han dańǵyly men Pýshkın kóshesiniń qıylysyndaǵy saıabaqta, "Han Shatyr" saýda-oıyn-saýyq ortalyǵynyń aýmaǵynda josparlanǵan merekelik otshashý ɵtpeıtin boldy. Nur-Sultan qalasy ákimdiginiń bastamasyn merekelik salıýttardyń demeýshileri qoldap, arnaıy qarastyrylǵan qarjyny Arys qalasynyń zardap shekken turǵyndaryna kómek kórsetý qoryna aýdarmaq.
