Elorda kúni qarsańynda «Arman qalam - Astana» balalar sýreti respýblıkalyq baıqaýynyń qorytyndysy shyǵarylady

ASTANA. 1 shilde. QazAqparat - 2 shilde kúni Astana qalasyndaǵy Oqýshylar saraıynda Astana kúnin merekeleýge baılanysty Qazaqstan halqy Assambleıasy qamqorlyǵymen mamyr-shilde aılary aralyǵynda ótkizilgen «Arman qalam - Astana» balalar sýreti respýblıkalyq baıqaýynyń qorytyndy kezeńiniń nátıjesi saltanatty túrde shyǵarylady, dep hbarlady Qazaqstan halqy Assambleıasynyń baspasóz qyzmeti.

Baıqaýdyń basty maqsaty - jas býyndy patrıottyq turǵyda tárbıeleý, óz eli úshin maqtanysh sezimin qalyptastyrý, ortaq qundylyqtarǵa jáne ulttyq birlikke baýlyp  tárbıeleý, sonymen qatar, balalardyń shyǵarmashylyq áleýetin ashýǵa járdemdesý. Atalǵan sharapatty shara sýret salý salasynda kózge túsken daryndy balalardy anyqtap, olardyń damýyna jaǵdaı jasaýda Qazaqstan halqy Assambleıasy júrgizip júrgen jumystardyń jalǵasy.

Jobanyń bas demeýshisi - «KazMicroFinance» mıkrokredıttik uıymy, uıymdastyrýshysy - «Qazaqstan halqy Assambleıasy Qory» qoǵamdyq qory jáne QR BǴM Respýblıkalyq qosymsha bilim berý oqý-ádistemelik ortalyǵy.

Oqýshylar saraıynyń kórme zalynda Qazaqstannyń 14 oblys ortalyǵynan jáne Astana, Almaty, Semeı, Túrkistan sııaqty 4 qalasynan suryptalǵan aımaqtyq baıqaýlarǵa qatysýshylardyń úzdik 70 jumysynyń kórmesi uıymdastyrylady. Onyń ishinen, Qazaqstannyń belgili sýretshileri, QR Sýretshiler odaǵynyń músheleri Gúlmıra Telǵozıeva, Armat Bektas, Muhtar Baıbosyn, Umsyn Arqabaeva kirgen ádilqazylar alqasy, kelesi atalymdarda jeńis tuǵyrynan kóringen jumystardy iriktep alady: «Dekoratıvti máneri úshin»; «Kórermender yqylasy júldesi»;  «Erekshe mazmunda órilgen eńbek úshin»; «Úzdik sýret»; «Úzdik grafıkalyq jeli» atalymdarynda jeńis tuǵyrynan kóringen umystardy iriktep alady.

Respýblıkalyq baıqaýdyń qorytyndy kezeńine qatysý úshin aımaqtardan barlyǵy 17 jeńimpaz kelip, olardyń ishinen qazylar alqasy júırikterdi tańdaıdy.

Baıqaý qatysýshylaryn Qazaqstan halqy Assambleıasy Hatshylyǵynyń basshylyǵy, QR Parlamenti Májilisiniń depýtattary, Astana qalasy ákimdigi men bilim berý basqarmasynyń, «KazMicroFinance» mıkrokredıttik uıymynyń jáne QR BǴM Respýblıkalyq qosymsha bilim berý oqý-ádistemelik ortalyǵynyń ókilderi quttyqtaıdy.

«Arman qalam - Astana» balalar sýreti respýblıkalyq baıqaýynyń qorytyndysy boıynsha balalar sýreti albomy shyǵarylyp, ony Qazaqstan halqy Assambleıasy Astana kúnine syılyq retinde tartý etedi. Barlyq marapattaý rásimine qatysýshylar men qonaqtarǵa estelik retinde, 2012-2013 jyldarǵa arnalǵan, balǵyn sýretshilerdiń úzdik jumystary beınelengen kúntizbeler tabystalady.

Marapattaý rásiminen soń baıqaýdyń qorytyndy kezeńine qatysýshy balalar úshin uıymdastyrýshylar arnaıy merekelik baǵdarlama ázirleıdi: qalany aralaý, Tuńǵysh Prezıdent murajaıyna, Báıterekke, «Dýman» oıyn-saýyq ortalyǵynyń muhıtaralyna barý, t.b.