Elorda kúni qarsańynda 30 juptyń nekesi qıyldy (FOTO)
ASTANA. QazAqparat - Astanada Elordanyń týǵan kúni qarsańynda «Atameken» kesheninde 30 juptyń saltanatty neke qııý rásimi ótti, dep habarlady qalalyq ákimdiktiń baspasóz qyzmeti.
«Úılený toıyn erekshe formatta ótkizýdiń keremet múmkindigi. Jas jubaılar parkte jınalyp, osy alańda nekelerin qııý týraly kýálikterdi tabystadyq. Qalyńdyqtarǵa gúl shoqtaryn tartý ettik. Resmı neke qııý saltanaty osylaı ótti, sodan keıin «Dýman» qonaq úı kesheninde syılyqtar utysy, tort kesý, vals jáne basqa da kóp qyzyqtar bolady», - deıdi Astana qalasynyń kásipkerlik jáne ónerkásip basqarmasy basshysynyń mindetin atqarýshy Ryskúl Qaýǵabaeva.
Qos júrektiń janynda kúıeý jigitter men qalyńdyqtar ant berdi. Saltanatty sharadan keıin jastar eń bıik týtuǵyryna kóterildi. Bári de sýretke jáne beınege túsirilidi.
«Merekege jańbyr da kedergi bolǵan joq, - deıdi jas jubaılar Baýyrjan men Symbat Surapbaı. - Bul taǵdyr shyǵar, úılený toıyn osy kúni ótkizemiz dep oılamaǵan edik. Bári de keremet. Úsh jyl boıy kezdesip, bıyl úılenýge sheshim qabyldadyq».
Jastardy tanymal telejúrgizýshi Aıgúl Mýkeı jáne akter, mýzykant, prodıýser Ánýar Nurpeıisov quttyqtady.
Erli-zaıypty atanǵan jastar aspanǵa shar ushyrdy.
