Elorda kúni is-sharalar kestesine ózgerister engizildi
ASTANA. 4 maýsym. QazAqparat - Astananyń 15 jyldyǵy - tek bas qala úshin emes, barlyq Qazaqstan úshin mańyzdy oqıǵa. Osy turǵyda Astananyń qarapaıym qatardaǵy qaladan HHІ ǵasyrdyń eń kórikti, eń zamanaýı sulý shaharyna aınalyp kele jatqanyn atap aıtqan jón.
Sondyqtan, 2013 Qala kúniniń ıdeıalyq-taqyryptyq tuǵyry bir jaǵynan Astanany jaıly da sáýletti, ekinshi jaǵynan rýhanı mádenı ortalyq retinde halyqaralyq dárejede tanytady. Sonymen qatar, is-sharalar kestesinde basty nazar qala turǵyndary men basqa qalalar men memleketterden keletin qonaqtardyń sany men qatysýyna shaqtalyp, barsha kópshilikke qoljetimdi negizde jasalýǵa aýdarylǵan.
astana.kz saıtynyń jazýynsha, osy ıdeıany júzege asyrý maqsatynda Astana qalasynyń ákimdigi qalany keshendi abattandyrý jóninde birqatar is-sharalardy júzege asyrdy. Shilde aıynyń birinshi onkúndiginde merekelik is-sharalar tikeleı merekeni keńinen atap ótýge baǵyttalǵan. Árbir tilek bildirýshi ózi qalaǵan is-sharalaryn taba alady. Kóptegen kontsertter men óner kórsetýler qazaqstandyq mádeıetti tanytýǵa, qalanyń ulttyq boıaýy men ereksheligin kórsetýge negizdelgen. Baǵdarlamalardyń boıaýyn Qala kúniniń qaıtalanbas mádenı brendi tolyqtyra túsedi. Atap aıtqanda: «Astana tóńiregindegi myńjyldyq» kóshpendiler órkenıeti festıvali, «Astana Arqaý» túrki mýzykasynyń festıvali, «Astanaǵa tartý» dástúrli mýzyka kontserti men «Serper» halyq aspaptar orkestri festıvli.
Bıylǵy jyly 1 mıllıonnan astam adam qatysatyn barlyǵy 50-ge tarta jalpyqalalyq, 20-ǵa tarta aýdandyq is-sharalar ótkizý josparlanǵan. Jyl saıyn demeýshilerdiń qarjysyna ótkiziletin sheteldik juldyzdardyń kontserti bıylǵy jyly ınvestorlar bolmaýy sebepti toqtatyldy. Sondaı-aq, sheteldik juldyzdar Tarkan, Patrıssııa Kaas, Il Divo kvartetiniń, London koroldik sımfonııalyq orkestri men Reseı juldyzdarynyń kontsertteri qoıylmaıdy. Olardyń ornyna qalalyqtarǵa elordanyń alańdary men gúlbaqtarynda úlken kontsertter beriledi.
Sonymen qatar, Astana kúninde:
- «Aıalaǵan Astana» Respýblıkalyq balalar baıqaýy, «Shattyq» balalar festıvali kontserttik baǵdarlamalary men balalar shyǵarmashylyq ujymy óneri;
- velosporttan Astana kýbogy, asyq atýdan «Altyn saqa» qalalyq týrnıri sporttyq, oıyn-saýyq qoıylymdary;
- kýlınarlyq kórmeler men baıqaýlar;
- «Qazaqstannyń alǵashqy áıel sýretshisi» kórmesi, «Astana-baǵy bıik asqarymsyń» kitap festıvali, «Músháıra» ádebıet pen óner festıvali - mádenı-aǵartýshylyq sıpattaǵy kórkem kórmeler men baıqaýlar;
- «Ekstrım tolqyny» sporttyq kópshilik sharalar, «Asqaqtaı ber, Astana!» túngi bı keshi, «Astana Kýbogy» KTK Halyqarlyq festıvali alańdardaǵy jastar baǵdarlamalary;
- qalanyń saýda ortalyqtaryndaǵy promo-aktsııalar - tort kesý saltanatty rásimi, utys oıyndary men aktsııalar;
- «Azııa jańǵyryǵy» tsırk festıvali, aımaqtyq teatr festıvali, «Zamandas» teatry qoıylymy men tsırk qoıylymdary usynylady.
