Elorda kúni: Nura aýdanynda jańa gúlzarlar men aýlalar saltanatty túrde ashyldy
ASTANA. KAZINFORM — Elordanyń Nura aýdanynda Astana kúnine oraı jańa qoǵamdyq keńistikter ashylyp, birqatar aýlany abattandyrý jumysy aıaqtaldy. Turǵyndardyń ıgiligine eki gúlzar, tórt aýla jáne jańa sport alańy paıdalanýǵa berildi, dep habarlaıdy qala ákimdiginiń resmı saıty.
Elorda kúni qarsańynda aýdanda «Altyn Shar-1» turǵyn úı kesheniniń janynda ınvestor qarajaty esebinen salynǵan jańa gúlzar ashyldy. Aýmaǵy shamamen bir gektar bolatyn demalys ornynda jaıaý júrginshiler joldary tóselip, serýendeýge arnalǵan aımaq jasaldy. Sondaı-aq aǵashtar, butalar men gúlder otyrǵyzylyp, oryndyqtar men qoqys jáshikteri ornatyldy.
Sonymen qatar buǵan deıin Balalardy qorǵaý kúnine oraı tehnıkalyq rejımde jumysyn bastaǵan «4 maýsym» gúlzarynyń saltanatty ashylýy ótti. Joba BI Group kompanııasymen birlesip júzege asyryldy. Skverdiń tujyrymdamasy jyl boıy sánin joǵaltpaıtyn ósimdikterdi tańdaýǵa negizdelgen. Munda 400-den astam aǵash pen 14 myńnan astam buta otyrǵyzylyp, jaıaý júrginshiler joldary, átkenshekter, shahmat ústelderi jáne basqa da abattandyrý elementteri ornatylǵan.
«Halyq qatysatyn bıýdjet» baǵdarlamasy aıasynda birden tórt aýla aýmaǵynda abattandyrý jumysy aıaqtaldy. Shyńǵys Aıtmatov kóshesindegi 41, 41A jáne 41B úılerdiń aýlalarynda zamanaýı balalar oıyn alańy, ashyq aspan astyndaǵy jattyǵý qurylǵylary ornatylyp, aýmaǵy kógaldandyryldy, oryndyqtar men qoqys jáshikteri qoıyldy. Al Syǵanaq kóshesindegi 16 jáne 16/1 úılerdiń aýlalarynda balalar oıyn alańy, fýtbol alańy, vorkaýt aımaǵy, jattyǵý qurylǵylary, demalys oryndary jasaqtaldy. Sonymen qatar aýmaǵy kógaldandyrylyp, jaryqtandyrý júıesi ornatyldy.
Budan bólek, «Úrker City» jáne «Boston Comfort House» turǵyn úı keshenderiniń mańynda kólemi 15×30 metr bolatyn jańa fýtbol alańy paıdalanýǵa berildi. Sonymen qatar irgeles aýmaǵy abattandyrylyp, turǵyndardyń sportpen shuǵyldanýy men demalýyna arnalǵan taǵy bir jaıly qoǵamdyq keńistik ázirlendi.
Osyǵan deıin Astana kúnine oraı elimizdiń bas qalasy týraly 20 qyzyqty derekti jarııalaǵanbyz.
