Elorda quqyq qorǵaý organdary úılestirý keńesiniń otyrysy ótedi

Bul týraly Astana qalalyq prokýratýrasynyń baspasóz qyzmeti habarlaıdy.

Jıynda barlyq múddeli quqyq qorǵaý jáne jergilikti atqarý organdary basshylarynyń qatysýymen ýákiletti memlekettik organdardyń kámeletke tolmaǵandar arasyndaǵy quqyq buzýshylyq jáne jasóspirimder arasyndaǵy óz-ózine qol salý oqıǵalarynyń aldyn alý máseleleri boıynsha atqarǵan sharalary men ózara is-qımylyna qatysty máseleler talqylanady. Sonymen qatar prokýrorlar jıynda ýákiletti memlekettik organdardyń ákimshilik aıyppuldardy óndirý, kóshe qylmystarynyń deńgeıin tómendetý, sybaılas jemqorlyq qylmystaryna qarsy kúrestegi jedel-izdestirý qyzmeti men tergeýdiń zańdylyǵy jáne quqyq qorǵaý organdarynyń ózara is-qımylynyń jaı-kúıi sııaqty ózekti máselelerdi ortaǵa salmaq.

Úılestirý keńesiniń otyrysynda joǵaryda atalǵan máseleler boıynsha ýákiletti organdardyń atqaryp jatqan jumystarynyń nátıjeleri, barlyq memlekettik organdardyń arasyndaǵy ózara is-qımyl deńgeıi, prokýratýra organdarynyń tekseristeriniń nátıjesinde anyqtalǵan zańbuzýshylyqtar men kemshilikter, sondaı-aq osy salalardaǵy kezdesetin problemalar men olardy sheshý joldary talqylanatyn bolady.