Elorda kýbogynda qazaqstandyq 23 boksshy fınalǵa shyqty
Qazaqstan boks federatsııasynyń málimetinshe, erler arasynda Qazaqstannyń 54 boksshysy synǵa túsken.
Sonyń 16-sy fınalǵa joldama aldy.
Tipti, keıbir salmaq dárejesinde Qaırat Sátjanov shákirtteri fınalǵa beriler joldamany ózara sarapqa salýǵa májbúr boldy.
Osylaısha kóshbasshy boksshylarymyzdyń naǵyz babynda ekeni qýantty. Bul jerlerde sońǵy álem chempıonatynyń fınalısteri - Temirtas Júsipov, Sáken Bıbosynov, Mahmud Sabyrhan syndy sańlaqtarymyzdy erekshe atap ótken jón.
Endi olar «Elorda kýbogynyń» chempıondyq ataǵyn Qytaı, Kýba, Ózbekstan boksshylaryna qarsy aıqasta sarapqa salady.
Aıta keteıik, jartylaı fınal kúni Qazaqstan áýesqoı boksynyń qazirgi tańdaǵy jarqyn juldyzy Sáken Bıbosynov 25 jasqa toldy.
Sonymen qatar, jartylaı fınalǵa aǵaıyndy-egizder Samatáli men Sanatáli Tóltaevtar jáne Aıbek, Nurbek Oralbaıdar da shyqty.
Al fınaldaǵy eń qyzyqty jekpe-jekterdiń biri 71 keli salmaq dárejesinde ótýi tıis. Munda jerlesimiz Aslan Shymbergenov álem chempıony, japon Sevon Okazavamen aıqasady.
Áıelder boksyna keler bolsaq, bas bapker Shámil Safıýllın senim artqan 45 arýymyzdyń jeteýi bas júldege talaspaq.
Munda báseke tipten joǵary. Elordaǵa álem myqtylary - Qytaı men Úndistan kelgen. Sondaı-aq, sońǵy kezderi kórshi Ózbekstan qyzdary da qarqyn alǵan.
Qyzdar da baryn salyp jatyr. Ásirese, Marına Volnovanyń erligin atap ótpeske bolmaıdy.
Qazaqstan áıelder boksynan tuńǵysh bolyp Olımpıada júldesin jeńip alǵan Marına 75 kelide fınalǵa shyqty. Onyń aqtyq aıqastaǵy qarsylasy - Qytaı boksshysy.
Odan bólek, Jaına Shekerbekova men Karına Ibragımova da ústemdigin baıqatyp, fınalǵa shyqty.
Al fınaldaǵy boksshylarynyń sany boıynsha Qazaqstan arýlary tek Qytaıǵa jol berip tur.
Fınaldyq jekpe-jekter 4 shildede elorda ýaqytymen saǵat 14:00-de bastalady.
