Elorda kósheleriniń birine Shaısultan Shaıahmetov esimin berý máselesi pysyqtalady
ASTANA. KAZINFORM – Elorda kósheleriniń birine memleket jáne qoǵam qaıratkeri Shaısultan Shaıahmetov esimin berý máselesi pysyqtalady. Bul týraly Senat depýtattarynyń saýalyna Úkimet basshysynyń orynbasary Tamara Dúısenovanyń jaýabynda aıtylǵan.
«Búgingi tańda elimizde obektilerge, kóshelerge ataý berý jáne olardyń ataýlaryn ózgertý jumystarynda Qazaqstan Respýblıkasy Prezıdenti Ákimshiligimen kelisilgen, Respýblıkalyq onomastıka komıssııasy bekitken «Tarıhı tulǵalar» tizimi basshylyqqa alynady. Memleket basshysynyń Ulttyq quryltaıda onomastıka salasy boıynsha bergen tapsyrmasyna sáıkes, atalǵan tizim 2023 jyly jańartylyp, 2024 jylǵy 24 qańtarda Respýblıkalyq onomastıka komıssııasynyń otyrysynda qaralyp, bekitildi. Tizimge elimizge belgili tarıhı tulǵa Sh.Shaıahmetovtiń esimi de engizildi», - dedi vıtse-premer jaýabynda.
Onyń atap ótýinshe, onomastıkalyq obektilerge ataý berý jáne olardyń ataýlaryn ózgertý barysynda basshylyqqa alý úshin tizim jergilikti ákimdikterge jiberildi.
«Osyǵan baılanysty elorda kósheleriniń birine Sh.Shaıahmetovtiń esimin berý týraly máselesin Astana qalasynyń ákimdigi zańnamada belgilengen tártipke sáıkes pysyqtaıtyn bolady. Memlekettik menshik obektilerine ataý berý (ataýyn ózgertý) máselesi Úkimettiń 1996 jylǵy 5 naýryzdaǵy № 281 qaýlysymen reglamenttelgen. Astana, Almaty, Shymkent qalalarynyń jáne oblystardyń óńirlik biliktilikti arttyrý ınstıtýttary ádilet organdarynda «Órleý» biliktilikti arttyrý ulttyq ortalyǵy» aktsıonerlik qoǵamynyń fılıaldary (budan ári – «Órleý» BAUO) túrinde tirkelgen. Azamattyq kodekstiń 43-babynyń 3-tarmaǵyna sáıkes fılıaldar men ókildikter zańdy tulǵa bolyp tabylmaıdy. Osyǵan baılanysty Almaty qalasyndaǵy «Órleý» BAUO fılıalyna ǵalymnyń esimin berý múmkin bolmaıdy», - dedi Tamara Dúısenova.
Úkimet basshysynyń orynbasarynyń dereginshe, Ahmet Baıtursynuly atyndaǵy Qostanaı óńirlik ýnıversıteti Sh.Shaıahmetov atyndaǵy ataýly stıpendııany osy jylǵy 1 qyrkúıekten bastap berýdi josparlap tyr. Ataýly stıpendııanyń mólsheri jáne olardy tóleý tártibi týraly máseleler bıyl naýryzda ýnıversıtettiń Ǵylymı keńesiniń otyrysynda qaralady.