Elorda kósheleriniń birine Marko Polo esimi beriledi

ASTANA. KAZINFORM — Elorda kósheleriniń birine Marko Polo esimi beriledi. Bul týraly Aqordada Italııa Prezıdenti Serdjo Mattarellamen keńeıtilgen quramdaǵy kelissózder barysynda Memleket basshysy Qasym-Jomart Toqaev aıtty. 

— Italııa Qazaqstannyń eń iri úsh saýda seriktesiniń biri bolyp qala beredi. Ekonomıkalyq yntymaqtastyǵymyz óte qarqyndy ári odan ary ósimge de mol áleýet bar. Biz Italııanyń Qazaqstanǵa eksport kólemin ulǵaıta túsý josparyn qoldaımyz. Sońǵy 20 jylda Italııa bizdiń ekonomıkamyzǵa 7,5 mlrd dollar ınvestıtsııa saldy jáne naryǵymyzda tabysty jumys istep turǵan 250 ıtalııalyq kompanııa bar. Asa mańyzdy shıkizat materıaldary, munaı hımııasy, mashına jasaý, kólik pen logıstıka, jeńil ónerkásip, tamaq ónerkásibi, jasandy ıntellekt, qarjy, týrızm, bilim syndy salalarda úlken múmkindik baıqap otyrmyn, — dedi Qazaqstan Prezıdenti.

Memleket basshysynyń aıtýynsha, Qazaqstan men Italııa parlamenttik deńgeıde ózara belsendi is-qımyldy jolǵa qoıyp, BUU jáne basqa da halyqaralyq uıymdar aıasynda yntymaqtasady. Ótken jyly «Ortalyq Azııa — Italııa» birinshi sammıti tabysty ótti.

— Elderimiz mádenı jáne gýmanıtarlyq salada belsendi yntymaqtastyqty qoldaıdy. Sonymen qatar Astananyń ortalyq kósheleriniń biri Italııa halqynyń dańqty uly Marko Polonyń atymen atalatyndyǵyn habarlaıtynyma qýanyshtymyn. Bul Italııamen tyǵyz dostyq baılanysymyzdyń sımvolyna aınalady, — dedi Qasym-Jomart Toqaev.

Aıta keteıik, Aqordada Memleket basshysy Qasym-Jomart Toqaev elimizge resmı saparmen kelgen Italııa Prezıdenti Serdjo Mattarellany qarsy aldy.