Elorda kósheleriniń birine armııan álipbıiniń negizin qalaǵan Mesrop Mashtotstyń esimi beriledi

ASTANA. KAZINFORM – Astana máslıhatynyń turaqty komıssııasy elordadaǵy kóshelerdiń birine armııan álipbıiniń negizin qalaǵan Mesrop Mashtotstyń esimin berýdi qoldady.

- Ótken jyly 14-15 sáýirde Memleket basshysy Qasym-Jomart Kemelulynyń Armenııaǵa resmı sapary boldy. Sol kezde ekonomıka, saıasat, mádenıet salalarynda ártúrli kelisimshart jasaldy. Kelisimderdiń birinde Armenııanyń Erevan qalasynda qazaqtyń uly oıshyly Abaı Qunanbaıulynyń esimin kóshege ne saıabaqqa berý, dál solaı armııandardyń uly tulǵalarynyń biri Mesrop Mashtotstyń esimin elordadaǵy kóshe ne saıabaqtardyń birine berý týraly ýaǵdalastyq bolǵan. Osyǵan baılanysty biraz kelisóz júrgizilip, talqylaý boldy, - dedi komıssııa otyrysynda Astana qalalyq tilderdi damytý jáne arhıv isi basqarmasynyń basshysy Sáken Esirkep.

Onyń atap ótýinshe, bıyl 11 aqpanda Erevan qalasynyń aqsaqaldar keńesi qalanyń Avan aýdanynda ornalasqan saıabaqqa Abaı Qunanbaıulynyń esimin berý týraly sheshim qabyldady.

Saıabaq Almaty kóshesiniń boıynda ornalasqan. Jalpy aýdany 2 400 sharshy metrden asady. 

- Osyǵan oraı biz de óz tarapymyzdan 16 sáýirde Astana qalalyq onomastıka komıssııasynyń kezekti otyrysyna jınaldyq. Sol jerde Nur aýdanynda, Astana arena stadıony men Saryarqa velotregi arasyndaǵy uzyndyǵy 750 metrdi quraıtyn, ıaǵnı Turan dańǵylynan Qabanbaı batyrǵa deıingi kóshege armııan álipbıiniń negizin jasaǵan, ádebıeti men ulttyq mádenıetiniń negizin qalaǵan iri tulǵalardyń biri Mesrop Mashtotstyń esimin berý týraly sheshim shyǵardyq, - dedi.
Usynylǵan máseleni talqylaý nátıjesinde depýtattar sheshimdi biraýyzdan qoldady.

Buǵan deıin Armenııada ótken Qazaqstannyń mádenı kúnderi aıasynda Erevan qalasynda Abaı Qunanbaıuly atyndaǵy saıabaqtyń saltanatty ashylýy ótkenin jazǵan edik.