Elorda kósheleriniń birinde kólik qozǵalysy 28 qazannan bastap qaıta ashylady

ASTANA. KAZINFORM – Elordada 28 qazannan bastap D.Qonaev kóshesi boıynda kólik qozǵalysy qaıta jandanady, dep habarlaıdy elorda ákimdiginiń resmı saıty.

– Qozǵalys Turan dańǵylynan Qabanbaı batyr dańǵylyna deıingi aralyqta qalpyna keltiriledi. Nysannyń jerústi bóliginde negizgi qurylys jumysy aıaqtaldy: jańa jol jamylǵysy tóseldi, tańbalar syzyldy, qajetti jol belgileriniń barlyǵy ornatyldy. Atalǵan ýchaske tolyqtaı paıdalanýǵa daıyn, - delingen ákimdik habarlamasynda. 

Qazirgi ýaqytta kópir ótkeli qurylysynyń ústińgi bóliginde jáne irgeles aýmaqta árleý jáne abattandyrý jumysy jalǵasyp jatyr.

Osy ýchaskede qozǵalystyń qaıta ashylýy elordanyń ortalyq aýdandary arasyndaǵy kólik baılanysyn aıtarlyqtaı jaqsartyp, kórshiles magıstraldarǵa túsetin júktemeni azaıtýǵa jáne qala turǵyndary men qonaqtarynyń jolǵa ketetin ýaqytyn qysqartýǵa múmkindik beredi.

Buǵan deıin elordada Syǵanaq kóshesiniń ýchaskesi ýaqytsha jabylatynyn habarlaǵan edik.