Elorda kóshelerine kórnekti tarıhı tulǵalardyń esimderi beriledi

ASTANA. QazAqparat – Astana qalasyndaǵy birneshe kóshege tarıhı tulǵalardyń esimderi berilýi múmkin. Bul týraly ashyq talqyǵa shyǵarylǵan qala ákimdiginiń qaýlysy men máslıhattyń tıisti sheshim qujatynda jazylǵan, dep habarlaıdy.

Sheshimge sáıkes, Almaty aýdanyndaǵy A-23 kóshesine – Ásken Nábıevtiń, A-24 kóshesine – Syrbaı Máýlenovtiń esimi beriledi. Sondaı-aq, Esil aýdanynda ornalasqan E-12 kóshesi – Mánshúk Mámetova, E-20 kóshesi – Shapyq Shókın, E-753 kóshesi – Sanjar Asfendııarov kóshesi bolyp atalady.

Al Saryarqa aýdanyndaǵy №187 kóshesine – Berdibek Soqpaqbaevtyń, №189 kóshege Beıbarys sultannyń esimi berilmek. Buǵan qosa, №23-16 kósheler Maǵjan Jumabaev dańǵylyna qosylady. Tıisinshe, oǵan tolyq osy dańǵyldyń ataýy beriledi. Al burynǵy Mánshúk Mámetova kóshesi – Qaramergen, Buqar jyraý kóshesinen bastalyp, №29/1 kóshesimen aıaqtalatyn Saýrannyń bóligi – Geıdar Álıev bolyp atalmaq.

Qujat 26 jeltoqsanǵa deıin ashyq talqylaýda bolady.