Elorda kóshelerin sý basý máselesi qalaı sheshiledi
NUR-SULTAN. QazAqparat - Nur-Sultan qalasynyń ákimi Altaı Kólginov «Jastar» yqshamaýdanyndaǵy tazartý qurylǵylarynyń qurylys barysymen tanysty. Bul týraly QazAqparat elorda ákimdigine silteme jasap habarlaıdy.
Memleket basshysy Qasym-Jomart Toqaev qala aktıvimen ótken jıynda jaýyn-shashyndyq káriz júıeleriniń qurylysy boıynsha jumystyń qarqynyn kúsheıtýdi tapsyrǵan bolatyn. Jańa qurylystardyń qýaty 40 myń tekshe metrdi quraıdy. Bul jaýyn-shashyndyq káriz júıeleriniń ótkizý qabiletin aıtarlyqtaı arttyrýǵa múmkindik beredi: jerústi aǵyndy sýlardy bógetsiz jınaýdy, aǵyzýdy jáne tazartýdy qamtamasyz etedi.
Qazirgi ýaqytta jumys istep turǵan sý jınaǵysh toǵandy qurǵatý jumystary aıaqtalyp, tazartý qurylǵylarynyń jerasty qurylysy bastaldy. Bul tazartý qurylǵylary Táshenov, Baraev, Ýálıhanov, Imanbaev jáne Respýblıka dańǵyldarynyń sý basýyn boldyrmaýǵa múmkindik beredi. Júıe jer astynda ornalasqandyqtan, qurylys alańynyń ústi abattandyrylyp, tynymbaq ornatý qarastyrylǵan. Qurylysty 2021 jylǵa qaraı aıaqtaý josparlanyp otyr. Búgingi tańda elordanyń jaýyn-shashyndyq kárizdik júıesi 14 tazartý qurylǵydan, 3 jınaqtaǵysh toǵannan turady.
