Elorda kóshelerin qardan tazalaýǵa qosymsha tehnıka jumyldyrylmaq

NUR-SULTAN. QazAqparat – Boran saldarynan elorda kóshelerin qardan tazartý úshin qosymsha tehnıkany jumyldyrý qajettigi bar. Bul týraly Nur-Sultan qalasynyń ákimi Altaı Kólginov málim etti, dep habarlaıdy QazAqparat tilshisi.

Ákimniń aıtýynsha, elordanyń mańyndaǵy eldi mekenderge qoǵamdyq kólik qatynasyn qalypqa keltirý sharalary qolǵa alyndy.

«Joldy tazalaýǵa shyqqan tehnıka bir júrip ótkennen keıin, arada 5-10 mınýtta joldardy qaıtadan qar basyp jatyr. Aqmola oblysynyń aýdandarymen birlese jumys istep jatyrmyz. Eń bastysy, qazir qoǵamdyq kólik qozǵalysyn turaqtandyrý. Tańerteń qıyndyqtar bolǵanyn baıqadyńyzdar. Tek qalanyń syrtynda emes, shahardyń aýmaǵyndaǵy kóshelerde de avtobýs qozǵalysy qıyndady», - dedi Altaı Kólginov qalalyq TJ departamentinde ótken otyrysta.

Osy oraıda ol kósheler men joldardy qardan tazalaý jumystary táýlik boıy júrgiziletinin atap ótti.

«Qar áli de túsedi, sondyqtan jaǵdaıǵa naqty baǵa berý kerek. Barlyq qyzmetterdi jumyldyramyz. Borandy eskere otyryp, qurylys jáne jol qyzmeti uıymdarynan qosymsha tehnıka tartý qajettigi bar. Qazirgi ýaqytta 1 myńnan astam ózimizdiń tehnıka bar», - dedi qala ákimi.

Qazirgi ýaqytta qardy shyǵarý úshin júk kólikteri men qardy tıeıtin arnaıy tehnıka, sondaı-aq joldy tazalaıtyn avtogreıderlerdi qosymsha tartý kerek.

«Shynyn aıtqanda, «Astana Tazalyq» tehnıkasynyń 40 paıyzǵa jýyǵy jaramsyz, tozyǵy jetken. Sondyqtan biz tehnıka satyp alýǵa qarajat bóldik. Sonyń 130 tehnıkasy keldi», - dedi Kólginov.