Elorda kósheleri dızaın-kodqa saı emes jarnamadan tazartyla bastady

ASTANA. QazAqparat – Astanada qala kelbetin dızaın-kod boıynsha retke keltirý jumysy qarqyndy júrip jatyr, dep habarlaıdy QazAqparat elorda ákimdiginiń resmı saıtyna silteme jasap.

Bir apta ishinde qala boıynsha 800-ge jýyq zańsyz ilingen mańdaısha men jarnama baneri alynyp tastaldy. Olardyń barlyǵy 2019 jyly bekitilgen Astana dızaın-kodyna sáıkes kelmeıdi.

Nura aýdanynyń ákimdigi «Astana-Jarnama» KMM-men birlesip 9 turǵyn úı kesheninde («Qulager», «Jaǵalaý-3», «Qulager-2», «Kórkem Tower») ornalasqan ShOB sýbektileriniń tilder týraly zańnyń saqtalýy jáne zańsyz jarnamanyń joıylýyn tekserip shyqty. Nátıjesinde 26-28 shilde kúnderi 91 jarnama men 30 mańdaısha demontajdaldy.

Sondaı-aq, 36 habarlama berilip, 3 turǵyn úı kesheninde («Aru Qala», «Manhetten», «Manhetten») ornalasqan mańdaıshalardy dızaın-kodqa sáıkestendirý boıynsha is-qımyl algorıtmi tabystaldy.

Al, Saryarqa aýdanynda zańsyz ilingen 382 jarnama men mańdaısha alynyp tastaldy.

Baıqońyr aýdanynda jyl basynan beri apparat qyzmetkerleri túsindirý jáne zańsyz jarnamalardy bólshekteý boıynsha 40-tan astam kóshpeli is-shara ótkizdi. Qorytyndysy boıynsha búgingi kúni 300-ge jýyq zańsyz jarnama obektisi bólshekteldi.

Qalǵan aýdandarda da osy baǵyttaǵy jumys qarqyndy júrip jatyr. Osylaısha, bir apta ishinde ákimdik qyzmetkerleriniń jumysynyń nátıjesinde dızaın-kodqa sáıkes kelmeıtin 800-ge jýyq zańsyz ilingen bannerler men mańdaıshalar alynyp tastaldy.

Aıta keteıik, 2019 jyldyń jeltoqsan aıynda qala máslıhaty dızaın-kodty bekitken. Alaıda, pandemııaǵa baılanysty jumys keıinge shegerilgen. Bıyl 4 sáýirinde Astana qalasyn damytý máseleleri jónindegi keńeste Prezıdent Q. Toqaev kóshe jarnamasyn ornalastyrýǵa qoıylatyn talaptardyń saqtalýyn baqylaýdy kúsheıtý týraly tapsyrma bergen bolatyn.