Elorda kórermenderi Іlııa Jaqanovtyń án romanstaryna tánti boldy
ASTANA. QazAqparat - Qazaqstan Respýblıkasynyń Ulttyq akademııalyq kitaphanasynda jazýshy, kompozıtor, óner zertteýshisi, Qazaqstannyń jáne Qyrǵyzstannyń eńbek sińirgen mádenıet qyzmetkeri, Qazaqstannyń eńbek sińirgen qaıratkeri, Halyqaralyq Jambyl atyndaǵy syılyqtyń laýreaty, «Parasat» ordeniniń ıegeri Іlııa Jaqanov oqyrmandarmen kezdesti.
Kórermenderge erekshe kóńil-kúı syılaǵan bul kesh ánmen bastaldy. Qazaqstan Respýblıkasynyń eńbek sińirgen ártisi, professor Kenjeǵalı Myrjyqbaı kompozıtordyń «Jan sáýlem» ánin shyrqady. Ánshi men kompozıtor arasyndaǵy suhbat túrinde ótken kezdesý «Іlııa Jaqanovtyń án romanstary» dep ataldy.
Іlııa Jaqanov astanalyqtarǵa ómir joly, áıgili ánderiniń shyǵý tarıhy týraly áserli áńgimelep berdi.
K.Myrjyqbaı kompozıtordyń Balqantaý, Jetisý, Qyrǵyz tsıkldik romanstarynan ánderdi kezek-kezek shyrqap, kórermenderdiń qoshemetine bólendi.
Osy keshte І.Jaqanovtyń álemge áıgili jazýshy Shyńǵys Aıtmatovpen dostyǵy týraly baıandaldy.
Budan keıin kompozıtor 1981 jyly dúnıege kelgen jáne halyqtyń erekshe yqylasyna bólengen «Edil-Jaıyq» án-panoramasynyń shyǵý tarıhy, Juban Moldaǵalıevtiń oǵan sóz jazýy jóninde aıtyp berdi.
Kenjeǵalı Myrjyqbaı «Edil-Jaıyq» ánin zor tebirenispen oryndap bergende, zalǵa jınalǵandar aıryqsha qurmet kórsetti.
Osy keshte kompozıtordyń «Áselim - ánim», «Jaılaýkól keshteri» jáne basqa da ánderi oryndaldy, óner súıer qaýym án qaıyrmalaryn qosyla aıtyp otyrdy.
І.Jaqanov qoǵam, mádenıet týraly oı tolǵady. Halyqtyq mýzykanyń tereńdigine mán berilýi qajet ekenin atap ótti. Búgingi tańda jas urpaqtyń arzan, dańǵyrlaǵan áýenderge eliktep bara jatqanyna ókinishin bildirdi. Ánder men suhbatty uıyp tyńdaǵan kitaphana oqyrmandaryna rızashylyǵyn jetkizdi.
Belgili qoǵam qaıratkeri Myrzataı Joldasbekov óziniń synyptasy, dosy Іlııa Jaqanov týraly oılarymen bólisti.
Ulttyq akademııalyq kitaphananyń bas dırektory, pedagogıka ǵylymdarynyń doktory Úmithan Muńalbaeva kompozıtorǵa shyǵarmashylyq tabys tilep, oqyrmandar atynan syı-sııapat kórsetti.
