Elorda qajylary qasıetti saparǵa attandy
ASTANA. QazAqparat - Búgin Astana halyqaralyq áýejaıynan 300-den asa Qazaqstan azamaty ulyq ǵıbadat - qajylyq saparyna attandy.
Otandastarymyzdy shyǵaryp salý sharasyna Qazaqstan musylmandary dinı basqarmasynyń naıb múftıi Naýryzbaı qajy Taǵanuly men Apparat basshysy Ǵılymbek Májıev qatysyp, aq nıet, duǵa-tilekterin aıtty, dep habarlaıdy muslim.kz.
«Búginde dinı basqarma tarapynan qasıetti qajylyq saparyna úlken mańyz berilip, qyzmet sapasyn arttyrýǵa den qoıyldy. Bas múftıimiz osy maqsatta arnaýly Qajylyq mıssııasyn quryp, onyń quramyna sizderdiń qyzmetterińizge bilikti de bilimdi din mamandaryn, dárigerler men jýrnalıster qosynyn qosty. Asyl dinimizdi dáriptep, ımandylyqty nasıhattaýǵa osyndaı keńshilik bergen áýeli Alla Taǵalaǵa maqtaý-madaqtar bolsyn. Memleketimiz de dástúrli dinimizge úlken qamqorlyq tanytyp keledi. Jyl saıyn qajylyqqa barýǵa nıetti jandar qatary artýda. Búginde el tarıhynda tuńǵysh ret Saýd Arabııasyna elimizden tikeleı áýe reısteri iske qosylyp otyr. Sizderge qasıetti qajylyq saparyna aman baryp, Otanymyzǵa esen oralýlaryńyzǵa tilektestik bildiremiz. Alla Taǵala qajylyqtaryńyzdy qabyl qylǵaı», - dedi naıb múftıi Naýryzbaı qajy Taǵanuly.
Aıta ketsek, Qazaqstan men Saýd Arabııasy koroldigi arasyndaǵy ortaq kelisimge sáıkes, halyqaralyq «FlyNas» áýe kompanııasy el qajylaryna qyzmet kórsetedi. Qazaqstan qajylary endigi ýaqytta osy kompanııa arqyly tikeleı Mádına, Djıdda qalalaryna usha alady.
