Elorda kásiporyndarynyń ónimderi qaı elderge eksporttalady
ASTANA. KAZINFORM — Bıyl 7 aıda elorda kásiporyndary 2 mlrd dollardyń ónimin eksportqa shyǵardy. Bul týraly Astana qalalyq ınvestıtsııalar jáne kásipkerlikti damytý basqarmasy basshysynyń orynbasary Nurjan Áshimov aıtty.
— Jeti aıdyń qorytyndysynda Astanada ónerkásip óndirisiniń kólemi 2 trln 570 mlrd teńgeni qurap, 11,3 paıyzǵa ósti. Bul rette óńdeý ónerkásibi negizgi draıver bolyp otyr. Onyń úlesi 95 paıyzdy nemese 2 trln 400 mlrd teńgeni quraıdy. Bul óte mańyzdy kórsetkish. Óıtkeni dál osy óńdeý ónerkásibi qosylǵan quny joǵary ónim óndiredi. Búginde elordada mashına jasaý, azyq-túlik ónimderin, qurylys materıaldaryn, plastmassa buıymdaryn óndirý jáne basqa da baǵyttar belsendi damyp keledi. Máselen, mashına jasaý salasynda ósimniń joǵary qarqyny saqtalýda. Qazirdiń ózinde elorda lokomotıvter men elektrovozdar óndiretin mańyzdy ortalyqtardyń birine aınaldy. Sonymen qatar qurylys materıaldaryn, elektrotehnıkalyq ónimder men jabdyqtardy óndiretin kásiporyndar da damyp keledi, — dedi N.Áshimov elordanyń kommýnıkatsııalar qyzmetinde ótken brıfıngte.
Onyń málimetinshe, azyq-túlik óndirisinde de jaqsy dınamıka baıqalady. Jańa óndiris oryndarynyń iske qosylýy jáne jumys istep turǵan kásiporyndardyń óndiristik qýattaryn keńeıtý esebinen otandyq ónim shyǵarý kólemi artyp keledi.
— Elordanyń eksporttyq áleýetiniń damýy da mańyzdy nátıjelerdiń biri bolyp otyr. Birinshi jartyjyldyqtyń qorytyndysy boıynsha óńdeý ónerkásibi ónimderiniń eksporty 2 mlrd AQSh dollaryn qurap, ótken jylmen salystyrǵanda shamamen 28 paıyzǵa ósti. Búginde elordalyq kásiporyndardyń ónimderi Qytaı, Túrkııa, Iran jáne TMD elderine eksporttalady. Eksporttalatyn taýarlardyń qatarynda lokomotıvter, elektrovozdar, jabdyqtar, azyq-túlik ónimderi, qurylys materıaldary jáne basqa da otandyq ónimder bar, — dedi basqarma basshysynyń orynbasary.
Buǵan deıin elordaǵa 3 aıda 1,7 mlrd dollar shetel ınvestıtsııasy tartylǵanyn jazǵan edik.
