Elorda kásiporyndary karantın kezinde júrip-turýǵa jalǵan anyqtamalar bergen
NUR-SULTAN. QazAqparat –Elordada karantın kezinde kedergisiz júrip-turý úshin bóten adamdarǵa jalǵan anyqtamalar bergen kásiporyndar anyqtaldy, dep habarlaıdy QazAqparat.
«Elordada birqatar kásiporyndar Nur-Sultan qalasynda kedergisiz júrip-turý úshin jalǵan anyqtamalar jasaǵan. Kásiporyn basshylary olarda jumys istemeıtin azamattarǵa da anyqtama bergen. Tártipbuzýshylyq faktilerin polıtsııa qyzmetkerleri planshettegi elektrondy baza arqyly tekserý kezinde anyqtady. Barlyq patrýldik qyzmetter planshettermen qamtylǵan. Tártipbuzýshylar endi jaýapkershilikke, tipti qylmystyq jaýapqa tartylýy múmkin», - delingen qala ákimdiginiń aqparatynda.
Aıta keteıik, ótken aptada qalada karantın rejımin buzǵany úshin 800-den astam azamat ákimshilik jaýapkershilikke tartyldy, onyń 32-si qamaýǵa alyndy, qalǵandaryna aıyppul salyndy.
Nur-Sultan qalalyq Ákimshilik polıtsııa bastyǵy Eljan Shópekovtiń aıtýynsha, karantın kezinde elordada bes myńǵa jýyq polıtseı qoǵamdyq tártipti qadaǵalaýda.
«Qala turǵyndarynyń kóbi tártipti buzyp jatqan joq. Alaıda, polıtsııany aldaýǵa tyrysatyn turǵyndarymyz da bar. Shaǵyn kásiporyn ıeleri azamattar qala ishinde kedergisiz, erkin júrip-turýy úshin jumys ornynan jalǵan anyqtamalar bergen. Olar ákimshilik, tipti qylmystyq jaýapkershilikke tartylýy múmkin», – dep atap ótti E. Shópekov.
Sońǵy aptada aıyp turaǵyna 400-ge jýyq avtokólik jetkizildi, 500-den astam memlekettik nómir tárkilendi.
«Karantınniń birinshi kúninen bastap tártip buzǵany úshin ákimshilik jaýapkershilikke shamamen úsh myń adam tartyldy. Polıtsııa turǵyndardy karantın rejımin buzbaýǵa jáne qaýipsizdik sharalaryn saqtaýǵa shaqyrady. Ózińizdiń jáne jaqyndaryńyzdyń densaýlyǵyn oılańyz,», - dedi Shópekov.
