Elorda qalany basqarýdyń jańa modeline kóshedi

- Astana búginde joǵary qarqynmen damyp keledi. Qalanyń ósýimen birge joldarǵa, kommýnaldyq jáne ınjenerlik ınfraqurylymǵa túsetin júkteme artyp, turǵyndardyń qaýipsizdikke, qyzmetterdiń jedel áreket etýine jáne qalalyq ortanyń sapasyna qoıatyn talaptary da kúsheıip otyr. Osyǵan baılanysty biz elordany basqarýdyń jańa modeline kóshý boıynsha júıeli jumys júrgizip kelemiz. Bul – derekterge, taldaýǵa jáne jasandy ıntellekt tehnologııalaryna negizdelgen basqarý modeli. Bıyl sáýir aıynda Memleket basshysynyń qatysýymen «Astana Smart City» strategııalyq jobasy iske qosyldy. Biz úshin bul – elordanyń tsıfrlyq damýy jolyndaǵy mańyzdy kezeń jáne qaýipsiz, tehnologııalyq ári turǵyndarǵa qolaıly qala qalyptastyrýǵa baǵyttalǵan naqty qadam, - dedi ol Astana qalasynyń kommýnıkatsııalar qyzmetinde ótken brıfıngide.

Onyń aıtýynsha, joba memlekettik-jekeshelik áriptestik aıasynda Astana qalasynyń ákimdigi, G42 halyqaralyq holdınginiń quramyna kiretin Presight AI kompanııasy jáne «Astana Innovations» AQ-nyń qatysýymen birlesip iske asyrylyp jatyr. Jobanyń negizgi maqsaty – qalanyń negizgi júıelerin biryńǵaı ıntellektýaldy platformaǵa biriktirý arqyly elordadaǵy qoǵamdyq jáne jol qaýipsizdigin arttyrý. Mundaı ekojúıe qaladaǵy jaǵdaıdy naqty ýaqyt rejıminde baqylaýǵa, derekterdi taldaýǵa, oqıǵalarǵa jedel den qoıýǵa jáne anaǵurlym naqty basqarýshylyq sheshimder qabyldaýǵa múmkindik beredi. Joba aıasynda birneshe negizgi baǵyt boıynsha tsıfrlyq arhıtektýra qalyptastyryldy.

- Birinshi baǵyt – zamanaýı derekter ınfraqurylymy. Qala qajettiligi úshin 100 serverlik tirekke eseptelgen egemendi Derekterdi óńdeý ortalyǵy quryldy. Ol tsıfrlyq júıelerdiń turaqty jumysyn, úlken kólemdegi aqparatty senimdi saqtaý men óńdeýdi qamtamasyz etedi, sondaı-aq jasandy ıntellekt negizindegi sheshimderdi engizý úshin tehnologııalyq negiz qalyptastyrady. Ekinshi baǵyt – beınebaqylaý jáne analıtıka júıesin ıntegratsııalaý. Búginde jasandy ıntellekt elementteri bar 60 myńnan astam qalalyq kamera biryńǵaı tsıfrlyq kontýrǵa biriktirildi. Júıe órt pen tútindi, qaldyrylǵan zattardy, tóbelesti, agressıvti minez-qulyqty, qoǵamdyq tártipti buzý faktilerin jáne basqa da oqıǵalardy anyqtaýdy qosa alǵanda, 35-ten astam jaǵdaılyq analıtıka túrin qoldaıdy, - dedi basqarma basshysynyń orynbasary.

Beksultan Qýandyqtyń atap ótýinshe, jol qaýipsizdigi – jobanyń jeke mańyzdy baǵyty. Elorda joldarynda 1 200-den astam apparattyq-baǵdarlamalyq keshen ornatylǵan. Olar qaýipsizdik beldigin taqpaý, kólik júrgizý kezinde uıaly telefon paıdalaný, jaıaý júrginshige jol bermeý jáne basqa da quqyq buzýshylyqtardy qosa alǵanda, 15-ten astam jol qozǵalysy erejesin buzý túrin tirkeıdi.

- Bizdiń ustanymymyz boıynsha, mundaı tehnologııalar eń aldymen quqyq buzýshylyqtardyń aldyn alýǵa, joldaǵy tártipti kúsheıtýge jáne azamattardyń qaýipsizdigin qamtamasyz etýge qyzmet etýi tıis. Jobanyń negizgi elementi – Ahýaldyq ortalyq. Ol qalalyq júıelerdiń derekterin naqty ýaqyt rejıminde biriktirip, kommýnaldyq, shuǵyl jáne basqa da qyzmetteriniń jumysyn úılestirýdi qamtamasyz etedi, - dedi ol.

Basqarma basshysy orynbasarynyń málimetinshe, platforma aǵymdaǵy jaǵdaıdy tirkeýge, onyń damý barysyn boljaýǵa jáne basqarýshylyq sheshimder qabyldaý úshin usynymdar qalyptastyrýǵa múmkindik beredi. Jol-kólik oqıǵasy, órt, qoǵamdyq tártipti buzý nemese basqa da oqıǵa anyqtalǵan jaǵdaıda, aqparat tıisti qyzmetterge jedel joldanady. Bul den qoıý ýaqytyn qysqartyp, adamı faktordyń áserin azaıtady.

- Osylaısha, biz reaktıvti basqarýdan proaktıvti basqarýǵa kezeń-kezeńimen kóship kelemiz. Qalalyq qyzmetter endi bolǵan oqıǵalarǵa ǵana áreket etip qoımaı, táýekelderdi aldyn ala anyqtaýǵa, oqıǵalardyń aldyn alýǵa jáne obektıvti derekter negizinde sheshim qabyldaýǵa múmkindik alady. Turǵyndar úshin bul – qaýipsiz qalalyq orta, qyzmetterdiń jedel jumysy, kólik jáne kommýnaldyq protsester sapasynyń artýy, sondaı-aq qalalyq ınfraqurylymdy tıimdi basqarý degen sóz. Aldaǵy ýaqytta platformanyń fýnktsıonalyn keńeıtý, qalalyq júıelerdi ıntegratsııalaý, beıneanalıtıkany damytý jáne qyzmetter arasyndaǵy ózara is-qımyl tıimdiligin arttyrý jumystary jalǵasatyn bolady, - dedi Beksultan Qýandyq.