Elorda irgesindegi jasyl aımaqqa bıyl 10 mln aǵash otyrǵyzylady
NUR-SULTAN. QazAqparat – Nur-Sultan irgesindegi «Jasyl aımaq» ormandy alqabynda jyl saıyn 8 mln aǵash kósheti otyrǵyzylady. Ósip jatqan aǵashtardyń deni - kópjyldyq jáne qylqanjapyraqty. Osy oraıda, «Jasyl aımaq» memlekettik respýblıkalyq kásipornynyń bas dırektory Muhıt Ramazanov QazAqparat tilshisine atalǵan aýmaqta orman sharýashylyǵyn damytý jumysy týraly aıtyp bergen edi.
«Jasyl aımaq» orman alqaby 2000 jyly 10 aqpanda qurylǵan. Al, aǵash otyrǵyzý jumystary 1998 jyldan bastap qolǵa alyndy. Sodan beri bul jerge 146 mln aǵash otyrǵyzyldy. Orman alqabynyń jalpy aýmaǵy - 90 myń ga. Bul jerde ósip jatqan aǵashtardyń qatarynda qaraqat, qaıyń, shaǵan, úıeńki, terek, jıde bar. Sonymen qatar, qylqan japyraqty aǵash túrleri de ósedi. Odan bólek, aǵashtar Sibir men Qytaıdan ákelinip otyrǵyzylǵan. Árıne, syrttan ákelgen aǵashtardyń beıimdelip ósip ketýi qıynǵa soǵady. Birden jersinip ketpeıdi, ol úshin arnaıy kútim kerek», - dedi Muhıt Ramazanov QR Ekologııa, geologııa jáne tabıǵı resýrstar mınıstrligi uıymdastyrǵan baspasóz týry barysynda.
Mamannyń málimdeýinshe, orman alqabyna otyrǵyzylatyn aǵash túrleri aldymen sol jerge beıimdeý protsesinen ótedi.
«Bizde 2 pıtomnık bar, sol jerde mamandar túrli aǵash kóshetterin otyrǵyzyp, zerdelep, synaqtan ótkizedi. Aǵash otyrǵyzý maýsymy kezinde 1500-2000 adam jumys isteıdi. Sondaı-aq, ózimizdiń kishigirim zerthanamyz bar. Ol jerde bizdiń mamandar ósimdikter tuqymynyń shyǵyndylyǵyn zertteıdi. Ár aǵash túri boıynsha jeke monıtorıng júrgiziledi. Sodan soń aǵash túrlerin synypqa bólinip, odan ári selektsııalyq ortalyqqa jiberiledi. Ol jerde aǵashtarǵa taldaý jasalady. Sonyń qorytyndysy boıynsha qaı jerde, qandaı aǵash ósirgen abzal degen tujyrymdama jasalady», - deıdi ol.
«Jasyl aımaq» ormandy alqabyna jospar boıynsha jyl saıyn 8 mln aǵash kósheti otyrǵyzylady.
«Bizdiń orman alqaby Prezıdent jarııa etken elimizde 2 mlrd aǵash otyrǵyzý jobasyna kiredi. Bıylǵy jospar boıynsha 4 myń ga jerge 10 mln aǵash kóshetin otyrǵyzamyz. Búginde atalǵan jumystyń 70 paıyzy oryndaldy. Ótken jyly 6 mln túp aǵash kósheti otyrǵyzyldy», - dedi kásiporyn basshysy.
Buǵan deıin habarlaǵanymyzdaı, osy kóktemde elimiz boıynsha 200 mln astam kóshet otyrǵyzyldy. Al, Aral teńiziniń tartylyp qalǵan jerlerin kógaldandyrý maqsatynda 3 mln 600 myń túp sekseýil egildi.
