Elorda irgesindegi turǵyn úı alaptarynda beınebaqylaý kamerasynyń sany artady

NUR-SULTAN. QazAqparat – Nur-Sultan qalasy mańyndaǵy turǵyn úı alaptarynyń qaýipsizdigin qamtý maqsatynda ondaǵy beınebaqylaý kameralarynyń sany eselene túspek. Bul týraly qalalyq Polıtsııa departamentiniń resmı ókili Danııar Oralov málim etti, dep habarlaıdy QazAqparat tilshisi.

«Qala qaýipsizdigimen qatar elorda mańaıyndaǵy turǵyn úı alaptarynyń da qaýipsizdigi de nazarda. Osy oraıda Kırpıchnyı, Ilınka, Qaraótkel sekildi turǵyn úı alaptarynda beınebaqylaý kamerasynyń sanyn arttyra túsetin bolamyz. Sondaı-aq, olardyń jumys istep turǵandyǵy da qadaǵalanady.. Jol kartasy aıasynda qala men onyń irgesindegi eldimekenderdegi beınebaqylaý kamerasynyń sany kóbeıe túspek», - dedi Danııar Oral Polıtsııa departamentinde ótken baspasóz máslıhatynda.

Resmı ókildiń aıtýynsha, qoǵam qaýipsizdigin qamtamasyz etý elordalyq tártip saqshylarynyń únemi nazarynda.

Óz kezeginde «Baıqońyr» aýdany Polıtsııa basqarmasynyń Jergilikti polıtsııa qyzmeti bóliminiń basshysy Qaırat Tólepov aýdandy beınebaqylaý júıesimen qamtý jumysy týraly aıtyp berdi.

«Baıqońyr aýdanynda 446 kópqabatty turǵyn úı bar. Olardyń 90 paıyzy beınebaqylaý kamerasymen qamtylǵan. Іsten shyqqan beınebaqylaý kamerasy anyqtalǵan jaǵdaıda jergilikti ákimdik pen polıtsııa bólimshesine olqylyqty joıý jónindegi habar dereý jetkiziledi», - deıdi bólim basshysy.

Buǵan deıin astanalyq polıtseılerdiń táýlik ishinde 100-ge jýyq qylmystyń betin ashqanyn habarlaǵan edik.

Sondaı-aq, baspasóz máslıhatynda 1 myńnan astam elorda turǵynyna quqyqtyq kómektiń kórsetilgeni aıtyldy.