Elorda irgesindegi eldi mekenderde qansha halyq turady

ASTANA. QazAqparat – Elordadan 30 shaqyrym radıýsta 39 eldi meken bar. Bul týraly «Astana bas jospary» ǵylymı-zertteý jobalaý ınstıtýty» JShS dırektorynyń orynbasary Serik Ábdirahmanov aıtty, dep habarlaıdy QazAqparat tilshisi.

«Elordadan 30 shaqyrym radıýsta boljamdy halyq sany 283 myń adamdy quraıtyn 39 eldi meken ornalasqan jáne maıatnıktik kóshi-qon deńgeıi – 85 myń adam. Demek, qalaǵa kún saıyn 85 myń adam kelip, ketedi. Astanadan 60 shaqyrym aımaqta 83 myń adam turatyn 50 eldi meken bar. Maıatnıktik kóshi-qon deńgeıi jylyna 11 myń adamdy quraıdy», - dedi búgin qoǵamdyq talqylaý kezinde «Astana qalasynyń 2035 jylǵa deıingi bas josparynyń» jańa jobasyn tanystyrǵan Serik Ábdirahmanov.

Onyń dereginshe, 60 shaqyrym aımaqtan kún saıynǵy jalpy kóshi-qon 96 myń adamǵa jetedi.

«Maıatnıktik kóshi-qon jaǵdaıyn jaqsartý úshin jobalyq sheshimderge sáıkes Astana agleomeratsııasy aımaǵyn qatar damytý, qosymsha jumys oryndaryn qurý, ómir sapasyn jaqsartý qajet», - dedi S.Ábdirahmanov.

Buǵan deıin «Astana qalasynyń 2035 jylǵa deıingi bas josparynyń» jańa jobasy boıynsha qoǵamdyq talqylaý ótkenin jazǵan edik.