Elorda irgesinde «Bozoq» murajaı-qoryǵy men Ulttyq sport ýnıversıteti salynady
«Úrker turǵyn alabynyń soltústiginde jalpy alańy 389 gektarǵa jýyq aýmaqta «Bozoq» tarıhı-mádenı murajaı-qoryǵyn salý josparlanýda. Bıýdjettik baǵdarlamanyń ákimshisi – Mádenıet jáne sport mınıstrliginiń «Bozoq» memlekettik tarıhı-mádenı murajaı-qoryǵy» RMQK», - dep atap ótedi ákimdik agenttiktiń resmı saýalyna oraı.
Sondaı-aq vedomstvo málimetinshe, Mádenıet jáne sport mınıstrliginiń Sport jáne dene shynyqtyrý isteri komıteti Qarqaraly tasjoly boıyna Qazaqstan Respýblıkasynyń Ulttyq sport ýnıversıtetin salatyn bolady. Onyń jalpy aýmaǵy – 20 gektardan astam.
Budan bólek, ákimdik bıyl paıdalanýǵa beriletin turǵyn úı josparyna ózgertý engizilmegendigin atap ótedi.
«Indýstrııa jáne ınfraqurylymdyq damý mınıstrliginiń Qurylys jáne turǵyn úı-kommýnaldyq sharýashylyq isteri komıteti Astana qalasy boıynsha 2,7 mln sharshy metr kóleminde turǵyn úıdi paıdalanýǵa berýdiń 2023 jylǵa arnalǵan jyldyq josparyn anyqtady. Búgingi tańda bul josparǵa ózgerister engizilmegen», - delingen jaýapta.
«Bozoq» mýzeıiniń ǵylymı hatshysy Aınagúl Ǵanıevanyń málimetine súıensek, «Bozoq» tarıhı-mádenı murajaı-qoryǵynyń qurylys jumystary bastalǵan.
Qazirgi ýaqytta orta ǵasyrlyq 2 kireberis portal men qorshaýy salynǵan. Kommýnaldyq-ınjenerlik jeliler tolyǵymen jetkizilgen.
«Murajaı-qoryq arqyly ata-babalarymyz Eýrazııa qurlyǵynda 6 myń jyl qalaı ómir súrgenin kórsetkimiz keledi. Ol úshin eneolıt dáýirinen bastap turaqty qonys keshenderin osy jerde qaıta qalpyna keltiremiz. Eneolıt dáýirine qatysty kóshpeliler jylqyny alǵash úıretken Botaı qonysy bolady. Bul jerge kelgen qonaqtar alǵashqy órkenıetpen tanysady. Odan keıin – qola dáýiri. Ol zamanda Ortalyq Qazaqstanda metallýrgııa jaqsy damyǵan. Sol zamannyń qonystaryn kórsetemiz. Bozaq qalashyǵynyń ózi ústi shatyrmen jabylyp, 40 gektar jerge ornalasady», - dedi ol.
