Elorda hırýrgteri kúrdeli operatsııany 7 mınýtta jasap, naýqasty aıaǵyna turǵyzdy
NUR-SULTAN. QazAqparat – Elordada Neırohırýrgııa ortalyǵynyń dárigerlerine omyrtqanyń dısk jaryǵyn alyp tastap, naýqasty aıaǵyna turǵyzý úshin bar bolǵany 7 mınýt qajet boldy, dep habarlaıdy QazAqparat.
«Qaraótkel aýyldyq okrýginiń (Ilınka) 72 jastaǵy turǵyny Amangeldi Úseıinov Ulttyq neırohırýrgııa ortalyǵyna sol aıaqqa beriletin bel aımaǵyndaǵy adam tózgisiz aýyrýlarǵa, sondaı-aq aıaqtyń uıýyna jáne aıaqty qozǵaltýdyń qıyndyǵyna baılanysty shaǵymmen júgindi. Ortalyqtyń Julyn neırohırýrgııasy jáne shetki júıke júıesiniń patologııasy bólimshesiniń dárigerleri patsıenttiń MRT sýretterin qaraý nátıjeleri boıynsha bel omyrtqasynyń degeneratıvti-dıstrofııalyq ózgeristerin anyqtady. Bólimshe dárigerleri omyrtqalardyń L4-L5 dıskisiniń jaryǵyn endoskopııalyq – transforamınaldyq jolmen alyp tastaý boıynsha operatsııa jasady», - delingen habarlamada.
Julyn neırohırýrgııasy bólimshesiniń meńgerýshisi, professor Talǵat Kerimbaevtyń aıtýynsha, jaryqty alyp tastaý operatsııasy jaryqtyń qol jetýi qıyn jerde ornalasqanyna qaramastan, bar bolǵany jeti mınýttan astam ýaqytty aldy. Bul jaǵdaıda dárigerler óte jyldam jáne jaraqatsyz, eń bastysy tıimdi emdeý ádisin tańdady. Ádette, mundaı oqshaýlanǵan jaryqtar kezinde keıinnen atalǵan segmentti ımplantty bekitý jolymen omyrtqa qurylymynyń bóligin alyp tastaıtyn jaraqattaýshy ádis qoldanylady.
Omyrtqa jáne julyn aýrýlaryn emdeýdiń osyndaı zamanaýı, joǵary tehnologııalyq, kishi ınvazııaly ádisterin qoldaný operatsııa ýaqytyn qysqartýǵa ári emdeý nátıjelerin jaqsartýǵa, sondaı-aq patsıentterdi operatsııalyq aralasýdan keıin erte merzimde aıaqqa turǵyzýǵa jáne olardy kúndelikti ómirge qaıta oralýyna múmkindik beredi.
Operatsııa jergilikti anestezııamen, naýqastyń esin tolyq saqtaı otyryp jasaldy, bul operatsııa aıaqtala sala patsıenttiń óz aıaǵyna turyp júrip ketýine múmkindik berdi. Aıta keterlik jaıt, naýqasty alańdatatyn barlyq belgiler tolyǵymen joıyldy.
«Julyn neırohırýrgııasy bólimshesiniń dárigerlerine, meıirgerlerine júrekjardy alǵystan basqa aıtarym joq, saýyǵyp kele jatqanyma qýanyshym sheksiz! Osy Ortalyqqa kelgende óz aıaǵymmen júre almadym, balalarym meni múgedekter arbasymen alyp keldi. Jıyrma kúnnen astam ýaqyt júre almaý bylaı tursyn, tipti eshqandaı qozǵalys jasaı almaı qaldym. Qazir men aqyryndap júre bastadym, jaqynda úıdegi sharýalarymmen de aınalysa bastaımyn dep oılaımyn. Barlyǵyna shyn kóńilden alǵys aıtasmyn!»- dedi naýqas Amangeldi Úseıinov.
