Elorda halqynyń sany jyl basynan beri 23 myńǵa artty
ASTANA. 24 qazan. QazAqparat - Astana qalasy halqynyń sany aǵymdaǵy esep boıynsha 2013 jyldyń 1 qyrkúıeginde 800 656 adamdy, sonyń ishinde Almaty aýdany boıynsha 366 219 (45,7%), Esil aýdany boıynsha 110 216 (13,8%), Saryarqa aýdany boıynsha 324 221 (40,5%) adamdy qurady.
Bul týraly astana.kz saıtyna qalalyq Statıstıka departamentinen habarlady.
«2013 jyldyń basymen salystyrǵanda, Astana qalasy halqynyń jalpy sany 22 458 adamǵa, sonyń ishinde Almaty aýdanynda 2 537, Esil aýdanynda 7479, Saryarqa aýdanynda 12 442 adamǵa kóbeıdi», - delingen habarlamada.
2013 jylǵy qańtar-tamyz aılarynda halyqtyń tabıǵı ósimi 12 085, kóshi-qon ósimi 10 373 adamdy qurady. Aıta keteıik, 2013 jylǵy qańtar-tamyz aılarynda jalpy Astana qalasy boıynsha 14 388 sábı dúnıege kelgen. Bul ótken jyldyń sáıkes kezeńimen salystyrǵanda 13,7% artyq. Sonymen qatar, halyqtyń tabıǵı ósimi ótken jyldyń qańtar-tamyzymen salystyrǵanda 17,8% artty jáne 12 085 adamdy qurady. Osy aralyqta qalada 2 303 adam qaıtys boldy, bul 2012 jyldyń qańtar-tamyzdaǵy kórsetkishten 3,8% kem.
Budan basqa, qańtar-tamyzda 1 jasqa deıingi balalar óliminiń 126 jaǵdaıy tirkeldi, bul 2012 jyldyń sáıkes kezeńine qaraǵanda 26 jaǵdaıǵa tómen. Sábıler ólim-jitiminiń koeffıtsıenti, árbir 1000 týylǵan nárestege shaqqanda 1 jasqa tolmaǵan 8,76 qaıtys bolǵan bala sanyn (2012 jylǵy qańtar-tamyzda 11,93) qurady. Halyq óliminiń negizgi sebepteriniń ishinde qan aınalymy júıesi aýrýlary 36,2%, óskinder 17,4%, jazataıym oqıǵalar, ýlaný jáne jaraqattaný 15,6% jaǵdaılary basym.
2013 jyldyń qańtar-tamyzynda AHAT organdarynda tirkelgen nekeler sany, ótken jyldyń sáıkes kezeńimen salystyrǵanda 6,3%, ajyrasýlar sany 15,2% artqan.
