Elorda halqy jyl basynan beri 8 myńǵa kóbeıdi
ASTANA. QazAqparat - Elorda halqynyń sany 8 myńǵa jýyq artyp, 821 952 adamdy qurady. Bul týraly astana.kz saıtyna qalalyq Statıstıka departamentinen habarlady.
«2014 jyldyń basymen salystyrǵanda, Astana qalasyndaǵy halyqtyń jalpy sany 7551 adamǵa, onyń ishinde Almaty aýdany boıynsha - 3249 adamǵa, Esil aýdany boıynsha - 1722, Saryarqa aýdany boıynsha - 2580 adamǵa kóbeıdi», - delingen habarlamada. 2014 jylǵy qańtar-aqpanda halyqtyń tabıǵı ósimi - 3182 adamdy, kóshi-qon ósimi - 4369 adamdy qurady. Aıta keteıik, 2014 jylǵy qańtar-aqpanda jalpy Astana qalasynda 3737 sábı týylǵan. Bul ótken jyldyń sáıkes kezeńimen salystyrǵanda 7,2%-ǵa artyq. Sonymen qatar, halyqtyń tabıǵı ósimi ótken jylǵy qańtarmen salystyrǵanda 10,9%-ǵa kóterildi jáne 3182 adamdy qurady. Osy aralyqta qalada 555 adam qaıtys boldy, bul 2013 jylǵy qańtar-aqpandaǵy kórsetkishten 10%-ǵa az. «Qańtar-aqpanda 1 jasqa deıingi balalar óliminiń 24 jaǵdaıy tirkeldi, 2013 jyldyń sáıkes kezeńinde 27 bolǵan. Sábıler ólim-jitiminiń koeffıtsıenti 6,42 (2013 jylǵy qańtar-aqpanda - 7,75) qurady»,- dep habarlady vedomstvodan. Halyq óliminiń basym sebepteri arasynda eń úlken úles salmaqty, ádettegideı, qan aınalymy júıesi aýrýlary - 37%, óskinder - 21,4% jazataıym oqıǵalar, ýlaný jáne jaraqattaný - 11,7% alady.
