Elorda halqy ómirden ozǵan kórnekti memleket qaıratkeri Sarybaı Qalmyrzaevpen baquldasty
ASTANA. 28 shilde. QazAqparat - Búgin elorda halqy ómirden ozǵan kórnekti memleket qaıratkeri Sarybaı Qalmyrzaevpen baquldasty. K.Baıseıitova atyndaǵy opera jáne balet teatrynda ótken rásimge jınalǵan adamnyń qarasy kóp.
QR Premer-Mınıstri Kárim Másimov, QR Prezıdenti Ákimshiliginiń basshysy Aslan Mýsın, QR Memlekettik hatshysy Muhtar Qul-Muhammed Elbasy atynan gúldeste qoıdy. Sondaı-aq QR Úkimet músheleri, Parlament depýtattary, ortalyq jáne jergilikti memlekettik basqarý organdarynyń laýazymdy qyzmetkerleri, qarapaıym halyq belgili memleket qaıratkerimen qoshtasyp jatty.
«Sarybaı Sultanuly belgili, kórnekti memleket qaıratkerleriniń biri. Ol kishige aǵa, úlkenge ini bolyp, bárimiz úshin úlgili azamat retinde ómirden ótti. Qanshama laýazymdy qyzmetterde bolsa da, qarapaıym azamattarǵa da óte kishipeıil bolatyn. Shalqaıǵanǵa shalqaıaatyn, eńkeıgenge eńkeıetin. Aqkóńil azamat edi. Elbasymyzdyń eń jaqyn adamdarynyń biri boldy», - dep atap ótti BAQ ókilderine suhbat bergen QR Parlamenti Májilisiniń depýtaty Azat Perýashev.
«Sarybaı Sultanulymen qyzmettes boldyq, bir óńirdiń azamattarymyz. Elimizdiń Statıstka komıtetinde qyzmet istegen kezinen bilemin. Sol kezde-aq onyń bilikti maman ekendigine kózim jetken edi. Respýblıkalyq deńgeıde qyzmette bolǵanda óziniń barlyq qarym-qabiletin kórsetti. Osydan keıin Elbasy onyń bilimin, tájirıbesin, alǵyrlyǵyn baǵalap, ózine jaqyn tartyp, úlken-úlken qyzmetterge senip taǵaıyndady. Sonyń bárinde de berilip jumys istedi», - deıdi kórnekti qoǵam qaıratkeri Ómirbek Baıgeldı.
